ފުވައްމުލަކު ސިޓީގައި މިރޭ ހިނގި ނުރައްކާތެރި އެކްސިޑެންޓެއް ހިނގާ އުމުރުން 17 އަހަރުގެ ކުއްޖަކު މަރުވެއްޖެއެވެ.

މައުލޫމާތު ލިބިފައިވާ ގޮތުގައި މަރުވެފައިވަނީ ފުވައްމުލަކު މާލެގަން އަވަށު ފެންފިނޮޅުގޭ މުޙައްމަދު މުތީއު ކިޔާ ކުއްޖެކެވެ. އޭނާ އަކީ މިއަހަރު ގްރޭޑް 10 ނިންމި ކުއްޖެކެވެ.

ފުލުހުން މައުލޫމާތު ދީފައިވާ ގޮތުގައި އެކްސިޑެންޓު ހިނގީ ފުވައްމުލަކު އެއާޕޯޓު ކައިރިން ދެ ސައިކަލު ޖެހިގެންނެވެ. ފުލުހުންނަށް މިއެކްސިޑެންޓުގެ މައުލޫމާތު ލިބިފައިވަނީ މިރޭ 19:15 ހާއިރުއެވެ.

މިއެކްސިޑެންޓުގައި އިތުރު ދެ މީހަކު ޒަޚަމް ވެފައިވެއެވެ. އެއީ ފުވައްމުލަކު ދިގުވާޑު އަވަށު އަންބަރީ ޖިނާހު އަލީ އާއި ފުނާޑު އަވަށު ރަކްޝާ މިގުދާދު ހުސެއިން އެވެ. މައުލޫމާތު ލިބިފައިވާ ގޮތުގައި މިދެމީހުންނަށް ފަރުވާ ދެމުންދަނީ ފުވައްމުލަކު ހޮސްޕިޓަލު އައިސީޔޫ ގައެވެ.