ރިޔާސީ އިންތިޚާބުގައި ރައީސް ޔާމީނަށް ލިބިވަޑައިގެންނެވި ބޮޑު ނާކާމިޔާބީގެ ސަބަބަކީ އެމަނިކުފާނުގެ އަނިޔާ ލިބުނު މީހުންގެ ދުޢާ ކަމަށާއި އެކަމަށް ރައީސް ޔާމީނު ޣާފިލުވެ ހުންނެވި ނަމަވެސް ﷲ ތަޢާލާ ޣާފިލުވެ ވޮޑިނުގަންނަވާނެ ކަމަށް ޝައިޚް މުޙައްމަދު އަނީލް ވިދާޅުވެއްޖެއެވެ.

ދީނީ އިލްމުވެރިން ވަނީ މިކަމުގެ ވާހަކަފުޅުތައް ވަރަށް ގިނައިން ދައްކަވައި ކަންބޮޑުވުން ފައުޅު ކުރއްވައިފައެވެ. ފަޟީލަތުއްޝައިޚް އިލްޔާސް ޙުސައިން ވިދާޅުވެފައިވަނީ މީސްތަކުންގެ މައްޗަށް އަދުލުވެރިނުވާނަމަ އެކަމުގެ ޢުޤޫބާތާއި ކުރިމަތިލާން ނުޖެހޭނެ މީހަކު ނުހުންނާނެ ކަމަށެވެ. ވަކި ހިސާބަކުން ﷲ ތަޢާލާގެ "ލަޓިބުރިން" ޖައްސަވާނެ ކަމަށާއި އެ ލަޓިބުރިން ޖައްސަވާ އަޑު ނުއިވޭނެ ކަމަށާއި ނަމަވެސް ޖައްސަވާ "އެތިފަހަރު" ވަރަށް ބާރުވާނެ ކަމަށެވެ.

"ނާކާމިޔާބުވީ ސަބަބާއިމެދު ރައީސް ޔާމީނު ރޭ ކުރެއްވި ހުރިހާ ސުވާލުތަކެއްގެ ޖަވާބަކީ މިއީ އެވެ. - މަނިކުފާނުއެވެ. މި ބޮޑު ނާކާމިޔާބީގެ ސަބަބަކީ މަނިކުފާނުގެ އަނިޔާ ލިބުނު މީހުންގެ ދުޢާ އެވެ. މަނިކުފާނު އެއާއިމެދު ޣާފިލުވެ ހުންނެވި ނަމަވެސް ﷲ ޣާފިލުވެ ވޮޑިއެއް ނުގަންނަވާނެއެވެ."