ޢަލީ އިޙްޞާން ފިރާޤް

ނަންފުޅާއި ނަސަބުފުޅު:

نوح عليه السّلام އަކީ أبي البشر  آدم عليه السّلام ގެ ދަރިކަލުން شيث عليه السّلام ގެ ނަސަބުފުޅުން ވަޑައިގެންނެވި ނަބީބޭކަލެކެވެ. إدريس عليه السّلام އަށް މުނިކާފަ ވިދާޅުވާ ބޭފުޅެކެވެ. އަލްޙާފިޡް އިބްނު ކަޘީރު ރަޙިމަހުﷲ، ނޫޙުގެފާނުގެ ފުރިހަމަ ނަންފުޅެއްކަމުގައި ވިދާޅުވެފައިވަނީ نوح، بن لامك، بن متوشلخ  بن إدريس - بن يرد، بن مهلاييل، بن قينن، بن أنوش، بن شيث، بن آدم أبي البشر عليه السّلام އެވެ. {އިބްނު ކަޘީރު، އަލްބިދާޔަތު ވައްނިހާޔަތު، ފުރަތަމަ ޖިލްދު، ޞަފްޙާ 237} 

آدم عليه السّلام އާއި نوح عليه السّلام އާ ދެމުދުގައި ދިހަ ޤަރުނު ފާއިތުވެގެން ގޮސްފައިވާކަން ޞައްޙަ ޙަދީޘުން ޘާބިތުވެއެވެ. 

أَبُو أُمَامَة البَاهِلي ގެ އަރިހުން ރިވާވެގެންވެއެވެ. މީހަކު އައިސް ރަސޫލާ صلّى اللّـه عليه وسلّم އަށް ސުވާލު ދެންނެވިއެވެ. [އޭ މާތްﷲ ގެ ރަސޫލާއެވެ. އާދަމުގެފާނަކީ ނަބީބޭކަލެއްތޯއެވެ؟] ޙަދީޘް ކުރެއްވިއެވެ. [އާނއެކެވެ. އާދަމުގެފާނަކީ ވަޙީބާވައިލެއްވުނު ނަބީބޭކަލެކެވެ.] އެމީހާ ދެންނެވިއެވެ. [އޭ މާތްﷲ ގެ ރަސޫލާއެވެ. އާދަމުގެފާނާއި ނޫޙުގެފާނާ ދެމެދު ފާއިތުވި މުއްދަތަކީ ކޮބައިތޯއެވެ؟] ޙަދީޘް ކުރެއްވިއެވެ. [ދިހަ ޤަރުނެވެ.]

{ابن حبان (ت ٣٥٤)، صحيح ابن حبان ٦١٩٠ •صحيح على شرط مسلم} 

މިދެންނެވި ޙަދީޘަކީ މުސްލިމުގެ ޝަރުތުތަކާ އެއްގޮތަށް ޞައްޙަ ޙަދީޘެއްކަމުގައި އަލްޙާފިޡު އިބްނު ކަޘީރު، އަލްބިދާޔަތު ވައްނިހާޔަތުގައި ލިޔުއްވައިފައިވެއެވެ. ނަމަވެސް މި ޙަދީޘް އިމާމު މުސްލިމު ރިވާކުރައްވައިފައެއްނުވެއެވެ. 

އަދި ނުނިމޭ