ރާއްޖޭގެ އެތެރޭގެ އުދުހުންތަކުގައި ފުރަން ވެލާނާ އިންޓަރނޭޝަނަލް އެއާޕޯޓަށްދާ ފަސިންޖަރުންނަށް ޓެކްސީގައި ޑޮމެސްޓިކް ޓާމިނަލާއި ހަމައަށް ދެވޭނެ ގޮތް މާދަމާއިން ފެށިގެން ހަމަޖައްސަން ނިންމައިފިއެވެ. 

އެމްއޭސީއެލް އިން ބުނީ އެތެރޭގެ އުދުހުންތަކުގައި ފުރަންދާ ފަސިންޖަރުންނަށް މިކަމުގެ ސަބަބުން ލުއިފަސޭހަތަކެއް ލިބިގެންދާނެ ކަމަށެވެ. "މިގޮތަށް ހަމަޖެއްސި ނަމަވެސް އަންނަ ފަސިންޖަރުންނަށް ޓެކްސީ ނަގަންޖެހޭނީ (ޓެކްސީއަށް އަރަންޖެހޭނީ) މިހާރެކޭވެސް އެއްފަދައިން ޓެކްސީ ކިޔޫއިން." 

މިޚިދުމަތް ދޭން ފަށާނީ އެކަމަށްޓަކައި މާދަމާ ހެނދުނު ބާއްވާ ޚާއްޞަ ރަސްމިއްޔާތެއްގައެވެ. މިހާރު ފަސިންޖަރުންނަށް ޖެހެނީ އިންޓަރނޭޝަނަލް އެއާޕޯޓް ގެ ޓާމިނަލް ކައިރިއަށް ފައިބައިގެން ލަގޭޖް ޓްރޯލީއަކަށް އަރުވައިގެން ހިނގާފައި ޑޮމެސްޓިކް ޓާމިނަލަށްދާށެވެ. ވީމާ މިބަދަލާއިއެކު ފުރަންދާ ފަސިންޖަރުންނަށް ވަރަށް ބޮޑު ލުޔެއް ލިބިގެންދާނެއެވެ.