ދިވެހިރާއްޖޭގެ މުވާސަލާތީ ތާރީޚުގައި ފުރަތަމަ ފަހަރަށް، ބައިނަލްއަގްވާމީ ސަބްމެރިން ކޭބަލް ސިސްޓަމް ކޮންސޯޓިއަމްގެ ފުރިހަމަ މެންބަރެއްގެ ގޮތުގައި ރާއްޖޭގެ ޑިޖިޓަލް ޚިދުމަތްދޭ ކުންފުންޏެއް ބައިވެރިވެ، "ސީ-މީ-ވީ 6" ސަބްމެރިން ކޭބަލް ސިސްޓަމް ދިރާގުން މިއަދު ރާއްޖޭގައި އިފްތިތާހްކޮށްފިއެވެ.

މިއަދު ބޭއްވުނު ޚާއްސަ ރަސްމިއްޔާތެއްގައި މި ސިސްޓަމް ރަސްމީކޮށް އިފްތިތާހްކޮށްދެއްވީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރާއި ދިރާގުގެ ސީ.އީ.އޯ އަދި މެނޭޖިންގ ޑިރެކްޓަރ، އިސްމާޢީލް ރަޝީދެވެ.

"ސީ-މީ-ވީ 6" އަކީ ދެކުނު އިރުމަތީ އޭޝިއާ، މެދުއިރުމަތި އަދި ހުޅަނގު ޔޫރަޕް ގުޅުވާލަދޭ ގްލޯބަލް ސުޕަރ-ހައިވޭއެކެވެ. އެންމެ ފަހުގެ ކަނޑުއަޑީގެ ކޭބަލް ޓެކްނޮލޮޖީން ފަރުމާކޮށްފައިވާ މި ސިސްޓަމް ސިންގަޕޫރުން ފެށިގެން ފަރަންސޭސިވިލާތާ ދެމެދު 11 ޤައުމެއްގައި ޖައްސާނެއެވެ.

ދިރާގުން މަޢުލޫމާތު ދެއްވިގޮތުގައި، މި ގްލޯބަލް ސިސްޓަމްގެ ފުރިހަމަ ބައިވެރިއަކަށްވުމަށްޓަކައި ދިރާގުން ވަނީ 2021 ވަނަ އަހަރު ދުނިޔޭގެ ބައިނަލްއަގްވާމީ 16 ޓެލްކޯ އަދި ޓެކް ކުންފުނި ޝާމިލްވާ ކޮންސޯޓިއަމެއްގައި ބައިވެރިވެފައެވެ. މި ބޮޑު އިންވެސްޓްމަންޓުގެ ސަބަބުން ދުނިޔޭގެ މުހިންމު އިންޓަނެޓް އެކްސްޗޭންޖް ޕޮއިންޓްތަކާއި ޑޭޓާ ސެންޓަރުތަކާއި ރާއްޖެ ސީދާ ގުޅުވާލެވި، ރާއްޖޭގެ ބައިނަލްއަގްވާމީ ކަނެކްޓިވިޓީ އިތުރަށް ހަރުދަނާވެގެންދާނެ ކަމަށް ދިރާގުން ފާހަގަކުރެއްވިއެވެ.

މީގެ އިތުރުން ކަސްޓަމަރުންނާއި ވިޔަފާރިތަކަށް ފޯރުކޮށްދޭ ހިދުމަތްތަކުގެ ފެންވަރު މިހާރަށްވުރެ ރަނގަޅުވެ، މުސްތަގުބަލުގައި ރާއްޖޭގެ އެކި ކަންކޮޅުތަކުގައި ޑިޖިޓަލް ހިދުމަތްތައް މިހާރަށްވުރެ ކުރިއެރުމަށް މަގުފަހިވެގެންދާނެއެވެ.