ޗައިނާގެ ސިޗުއާން ޕްރޮވިންޝިއަލް ޑިޕާޓްމަންޓް އޮފް އެގްރިކަލްޗަރ އެންޑް ރޫރަލް އެފެއާޒްގެ ފަރާތުން ރާއްޖޭގެ ދަނޑުވެރިންނަށް ދެލައްކަ ރުފިޔާގެ އަގުހުރި ތަކެތި ހަދިޔާކޮށްފިއެވެ. މި ތަކެއްޗާއި ރަމްޒީގޮތުން ހަވާލުވެވަޑައިގަތީ ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. އާއިޝަތު ރަމީލާއެވެ.

ދަނޑުވެރިކަމާއި ބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި، މިއަދު ބޭއްވުނު "މޯލްޑިވްސް - ސިޗުއާން ޓްރޭޑު އެންޑު އިންވެސްޓުމަންޓު ކޮންފަރެންސް"ގެ ތެރެއިން މި ހަދިޔާ ރަމްޒީގޮތުން ބަދަލުކުރެވުނެވެ. މި ހަދިޔާގެ އަގަކީ 100,000 ޗައިނީސް ޔުއާން ނުވަތަ 224،754 ދިވެހި ރުފިޔާއެވެ.

މީގެ އިތުރުން، ރާއްޖޭގެ ދަނޑުވެރިކަން ތަރައްޤީކުރުމަށް އެހީތެރިކަމާއި އެއްބާރުލުން ދިނުމާ ގުޅޭގޮތުން، ދިވެހި ސަރުކާރާއި ޗައިނާގެ "ސިޗުއާން ޕްރޮވިންޝިއަލް ޑިޕާޓްމަންޓް އޮފް އެގްރިކަލްޗަރ އެންޑް ރޫރަލް އެފެއާޒް" އާއި "ސިޗުއަން އެކަޑެމީ އޮފް އެގްރިކަލްޗަރަލް ސައިންސް" އާ ދެމެދު އެއްބަސްވުމެއްގައިވެސް މިއަދު ވަނީ ސޮއިކޮށްފައެވެ.

މި ހަދިޔާއާއި އެއްބަސްވުމަކީ ދިވެހިރާއްޖެއާއި ޗައިނާއާ ދެމެދު އޮތް ގުޅުން އިތުރަށް ބަދަހިކޮށް، ރާއްޖޭގެ ދަނޑުވެރިކަމުގެ ދާއިރާ ކުރިއެރުވުމަށް ލިބިގެންދާނެ ބޮޑު ހިތްވަރެއް ކަމަށް ބެލެވެއެވެ.