ގިނަ ބައަކު ބުނެއެވެ. އަހުރެން އެންމެ ފުރަތަމަ ލޯބީގެ ގޮތުން ގުޅުނީ މިވެނި މީހަކާއިއެވެ. އޭނާ ދެއްވެވުން އެދި ވަރަށް ގިނައިން ދުޢާކުރީމެވެ. ނަމަވެސް އޭނާ ލިބުނީ އެހެން މީހަކަށެވެ. އެހެންވެ މިހުންނަނީ ވަރަށް ދެރަވެފައެވެ. މަޔޫސްވެފައެވެ.  

މިފަދަ ބަސްތައް ބުނާ މީހުންނަށް އަހުރެން ބުނާނީ އެމީހުންނަށް ހަމަ ނުވިސްނެނީއެވެ. ތިމާއަށް އެންމެ ފައިދާހުރި ގޮތް އެނގޭ ހަމައެކަކުވެސް ނުހުންނާނެތީއެވެ. ކޮންމެ މީހަކަށްވެސް އެންމެ ފައިދާހުރި ގޮތް ﷲ ތަޢާލާ ދެކެދެނެވޮޑިގެންވާތީއެވެ. ވީމާ ޔަޤީންކުރަންޖެހޭނެ ކަމަކީ ތިމާއާއިމެދު ދެރަގޮތަކަށް އެއްވެސް ކަމެއް ﷲ ތަޢާލާ މިންވަރު ނުކުރައްވަވާނެކަމެވެ.  

ދެން މިޒަމާނަށް ބަލައިފިނަމަ ލޯބިވީމާ އެވާހަކަ ނުބުނެ ހަމައެކަނި ދުޢާކުރަން ހުންނާނީ ހާހަކުން މީހެކެވެ. އެހެންކަމަށްވާއިރު ތިބާ އޭނާ ދެކެ ލޯބިވާކަން އެނގިހުރެ އެހެން މީހަކާއި ކައިވެނިކުރާނީ ތިބާއަށްވުރެ ބޮޑަށް އެމީހަކު ދެކެ ލޯބިވާތީ ނޫންހެއްޔެވެ؟   

މިދައްކާ ވާހަކަތަކަށްވެސް ވިސްނާށެވެ! ކުރެވޭ ކައިވެނިތަކަށާއި ރޫޅެމުންދާ ކައިވެނިތަކަށް ބަލައި މިހައިތަނަށް ކުރެވިފައިވާ ދިރާސާތަކުން އެނގޭ ގޮތުގައި އެންމެ އުފާވެރި ޒަވާޖީ ޙަޔާތެއް ލިބިފައިވަނީ އެމީހާ ފުރަތަމަ ކައިވެނިކުރަން ބޭނުންވި މީހާ އާއި ކައިވެނި ކުރެވުމުން ކަމަށް ބުނެވޭކަށް ނެތެވެ. އަލަތު ކައިވެނި އުފާވެރިކަން މަތީގައި ދެމެހެއްޓިފައިވާވަރު މަދުކަމުންނެވެ. ކައިވެނި ނުރޫޅުމާއި އުފާވެރިކަމާއިއެކު ޒަވާޖީޙަޔާތް ވޭތިކުރަން ލިބުމަކީ ވަރަށް ތަފާތު ދެ ކަމެކެވެ. 

ވީމާ އެއްވެސް ކަމެއްގައި ތިމާ އެދޭ ގޮތަށް، އެދޭ ވަގުތު ކަންކަން ވެގެން ނުދިއުމަކީ ތިމާގެ ދުޢާ ޢިޖާބަ ނުކުރެއްވެވުން ކަމަށް ނުދެކޭށެވެ! އެފަދަ ޙާލަތުގައި ލަސްވަނީ ތިމާއަށް އެކަމުގައި އޮތް ފައިދާ ބޮޑުވުމުންކަން ޔަޤީންކުރާށެވެ! ﷲ ތަޢާލާއަށް ވަކީލުކުރުން ގިނަކުރާށެވެ! ވަކީލުކުރުމަކީ ﷲ ތަޢާލާގެ ލޯބިވެވޮޑިގަތުން އިތުރުވެގެންދާ ކަމެކެވެ. 

އަހުރެންގެ ގާތުގައި އެމީހުންގެ ވާހަކަތައް ކިޔައިދިން މީހުންނަށް ބަލާއިރު ކައިވެނިކުރަން ފުރަތަމަ އުޅެވުނު މީހާ އާއި ކައިވެނިނުކުރެވުނީތީ އުފާކުރާ މީހުން މަދެއް ނޫނެވެ. އޭނާ އާއި ކައިވެނި ނުކުރެވި، ކައިވެނިކުރެވުނު މީހާއަކީ ހުރިހާ ގޮތަކުންވެސް މާރަނގަޅު މީހަކު ކަމަށް ބުނި މީހުންވެސް މަދެއް ނޫނެވެ. މިވާހަކަތައް ކިޔައިމިދިނީ މިފަދަ އެތައް ބައިވަރު ސަބަބުތައް ހުރީތީއެވެ.

- އިސްލާމީ ތިލަފަތުގެ ދަރުސަކުން