އަނބިމީހާ އަނގައިން ނުބުނެ މަޑުން ހުންނާތީ "ތިއަހެން ތިއަ ހުންނަނީ ކީއްވެގެންތޯ؟" ފިރިމިހާ ތަކުރާރުކޮށް ސުވާލުކުރުމުންވެސް "ކަމެއް ނުވެއޭ" ނޫން ބަހެއް ނުބުނެ މަޑުން ތިބެއެވެ. މިކަން ބޮޑުވެގެން ފިރިމީހާ އަނބިމީހާ ގޮވައިގެން ފަރުވާ ހޯދަން ސައިކޮލޮޖިސްޓެއްގެ ގާތަށް ދިއައެވެ. 

ފިރިމީހާ ދެއްކި ވާހަކަތައް އަޑުއަހާފައި ޑޮކްޓަރު ބުނީ ކީކޭކަން އެނގޭހެއްޔެވެ؟ ބުނީ އަނބިމީހާގެ ތިއަ ބައްޔަށް ފަރުވާކުރެވޭނީ ފިރިމީހާއަށް ކަމަށެވެ. އެެހން ބުނުމުން ފިރިމިހާ ކަންބޮޑުވިއެވެ. ރުޅިވެސް ގަދަވިއެވެ. އެެހންވެ ބުނީ އޭނާއަކީ ޑޮކްޓަރެއް ނޫން ކަމަށެވެ. 

އެހެން ބުނުމުން ޑޮކްޓަރު ކިޔައިދިނެވެ. "ފުރަތަމަ މައްސަލަ ތިއަ ފެނުނީއެވެ. ތިމާގެ ކުށް ހާމަވާން އުޅޭކަމަށް ވިސްނޭއިރަށް ރުޅިގަދަވީއެވެ. ތިއަ ޙާލަތާ ކުރިމަތިލާން އަނބިމިހާއަށް ދުވާލަކު ކިތައް ފަހަރަށް ޖެހޭނެ ހެއްޔެވެ؟ ދެވަނަ ކަމަކީ އަނބިން އަބަދުވެސް ޤަބޫލުކޮސްގެން ތިބޭނީ އެމީހުންނަށް ކުރިމަތިވާ ކަންކަން ފިރިމީހާއަށް އެނގޭނެ ކަމަށެވެ. ދެނެގަނެވޭނެ ކަމަށެވެ. ސަބަބުވެސް މިބުނަނީއެވެ. ދެމަފިރިންގެ މެދުގައި އޮންނަން ޖެހޭ ގުޅުން ރަނގަޅު ގޮތުގައި ބާއްވައިގެން އުޅޭނަމަ އަނެކާއަށް އަންނަ ބަދަލުތަކާއި ބަދަލުތައް އަންނަން ޖެހޭ ސަބަބު ބައިވެރިޔާއަށް ރަނގަޅަށް އެނގޭނެއެވެ. 

ނުއެނގޭނަމަ އެކަމުން އެނގެނީ ދެމީހުންގެ މެދުގައި އޮންނަން ޖެހޭ ގުޅުން ނެތްކަމެވެ. އެކަކު އަނެކަކާއި ވާހަކަ ދައްކަންޖެހޭ ވަރަށް ވާހަކަ ނުދެއްކޭ ކަމެވެ. ދެން ނިކަން ބުނެބަލާށެވެ! މިކަންކަން ދެމަފިރިންގެ މެދުގައި އޮންނަނީ ކިހައިވަރަކަށް ހެއްޔެވެ؟" 

ފިރިމީހާގެ އަނގަ ބަންދުވިއެވެ. ދޭނެ ޖަވާބެއް ނުއެނގުނެވެ. އަނބިމީހާ ކުށްވެރިކުރަން އުޅުނީމާ ބޭޒާރުވީ ތިމާގެ ކުށެވެ. ތިމާއަށް އަނބިމީހާއަށް ވަޤުތުނުދެވޭކަމެވެ. ދައްކަންޖެހޭ ވަރަށް ވާހަކަ ނުދެއްކޭ ކަމެވެ. 

އެހިސާބުން ޑޮކްޓަރު ބުންޏެވެ. "ދެން ނިކަން ބުނެބަލާށެވެ! އަނބިމީހާއަށް މިޙާލަތުގައި ފަރުވާ ކުރެވޭނީ އަހުރެންނަށް ހެއްޔެވެ؟ ކަލެއަށް ހެއްޔެވެ؟ ކަލޭ އިޞްލާޙްކުރަންޖެހޭ ކަންކަން އިޞްލާޙްނުކުރާނަމަ އަހުރެން ކިތަންމެ ބައިވަރު ބޭސްތަކެއް އަނބިމީހާއަށް ކާންދިނިއްޔާ އެކަމުން އަނބިމީހާއަށް ކުރާނީ ކޮން ފައިދާއެއް ހެއްޔެވެ؟" 

މިއީ ހަމަ ކޮންމެ ދެމަފިރިއަކުވެސް ދަސްކޮށް ޢަމަލުކުރަންޖެހޭ ފިލާވަޅެކެވެ. ޢަމަލުކުރަންޖެހޭ ކަންކަމެވެ. މިފަދަ ޙާލަތެއްގައި އަނބިމީހާއަށް ކަންކަން ކުރެވޭ ގޮތުން ހިތްހަމަނުޖެހި ރުޅިއައިސް އެއްޗެތި ގޮވުމުން ޙައްލުކުރެވޭނީ ކޮން ކަމެއް ހެއްޔެވެ؟ 

އަހުރެންގެ ނަޞޭޙަތަކީ ކުރަންޖެހޭ މަސައްކަތް ކިތަންމެ ގިނަވެފައި ބުރަވިނަމަވެސް ދެމަފިރިންގެ މެދުގައި ބާއްވަންޖެހޭ ގުޅުންތައް ބާއްވާށެވެ! އެކުގައި ވަޤުތުހޭދަކުރާށެވެ. ވާހަކަދައްކާށެވެ! އަދި އަނެކާ ދައްކާ ވާހަކަތައް އަޑުއަހާށެވެ. އެއިރުން މިފަދަ ވަރަށް ގިނަ މައްސަލަތައް ޙައްލުކުރެވޭނެއެވެ. އިން ޝާ ﷲ 

- މަޢުލޫމާތު: ނަފްސާނީ ޢިލްމްވެރިއެއްގެ ވާހަކައިން