ޤައުމު ތަރައްޤީކޮށް ކުރިއެރުވުމުގައި އެކި ޚިޔާލުތަކާއި، އެކި ފިކުރުތަކާއެކީގައި މަޝްވަރާކޮށްގެން ނޫނީ އަޅުގަނޑުމެން ބޭނުންވާ އެންމެ ރަނގަޅު މިސްރާބަކަށް ނުދާނެ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

ވަޒީރު މިހެން ވިދާޅުވީ އިއްޔެ ރޭ ކޮޅުމަޑުލުގެ ވެރިރަށް ވޭމަންޑޫގައި ބޭއްވުނު ކޮޅުމަޑުލު އިސްރަށްވެހިންގެ މަހާސިންތާ 2024 ހުޅުވައިދެއްވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.

އެ މަނިކުފާނުގެ ވާހަކަފުޅުގައި، މަލްޓިޕާޓީ ޑިމޮކްރަސީގައި ތަފާތު ފިކުރުގެ އެކި ވިސްނުމުގެ ބޭފުޅުންގެ ޚިޔާލާއި މަޝްވަރާއަކީ ބޭނުންތެރި އަދި މުހިންމު ކަމެއްކަމަށް ފާހަގަކުރެއްވިއެވެ. އަދި މިފަދަ މަހާސިންތާތަކުގައި މަޝްވަރާކުރެވި ރެވި ޚިޔާލުފުޅުތައް އެއްގޮތްކުރުމަކީ މަލްޓިޕާޓީ ޑިމޮކްރަސީގައި ވަރަށް މުހިންމު ކަމެއް ކަމުގައި ވިދާޅުވިއެވެ.

ވަޒީރު އިތުރަށް ވިދާޅުވީ، ކަތީބުންނާއި އަތޮޅުވެރިންގެ ނިޒާމު ދިވެހިރާއްޖެއަށް ދެން ނާންނާނެ ކަމަށެވެ. އަދި ލާމަރުކަޒީ ނިޒާމަކީ ދިވެހި ރައްޔިތުން ބަލައިގެންފައިވާ ނިޒާމެއްކަން ޤައުމީ ޔުނިވަރސިޓީން ހެދި ދިރާސާއިން ވެސް ފެނިގެންދިޔަ ކަމަށް ފާހަގަކުރެއްވިއެވެ.

"އެންމެފަހުން ޤައުމީ ޔުނިވަރސިޓީން ހެދި ދިރާސާއިން ވެސް ފެނިގެން ދިޔައީ ލާމަރުކަޒީ ނިޒާމު ދިވެހި ރައްޔިތުން ބަލައިގެންފި ކަން. ދިވެހިރާއްޖޭގެ ވެރިކަން ލާމަރުކަޒީ ނިޒާމާ އެއް ގޮތަށް އޮންނަން ޖެހޭ ކަން. އެހެންވީމާ ރާއްޖޭގައި އޮންނާނީ ލާމަރުކަޒީ ނިޒާމު" ވަޒީރު ވިދާޅުވިއެވެ.

ލާމަރުކަޒީ ނިޒާމުގައި ޚިދުމަތް ފޯރުކޮށްދިނުމަށް ރައްޔިތުންގެ ތެރެއިން ބަސްބުނަން ތިބި ބަޔަކީ ކައުންސިލަރުން ކަމަށާއި، އެ މަޤާމު ހޯދުމަށް ކައުންސިލަރުން މަސައްކަތްކުރަން ޖެހޭ ކަމަށް ވެސް ވަޒީރު ވިދާޅުވިއެވެ. އަދި ކައުންސިލަރުންގެ މަޤާމުގެ ކަންކަން ކުރިއަށް ގެންދަންވީ ގޮތް ދެނެގަތުމަށް މިފަދަ މަހާސިންތާތައް މުހިންމު ކަމަށް ފާހަގަކުރެއްވިއެވެ.

ކޮޅުމަޑުލު އިސްވާރުންގެ މަހާސިންތާ 2024 ގައި އެ އަތޮޅުގެ ރަށްރަށުގެ ކައުންސިލްތަކުގެ ރައީސުންނާއި، ސެކްރެޓަރީ ޖެނެރަލުންނާއި، އަތޮޅުގެ ކަންކަން ބަލަހައްޓަވާ ދައުލަތުގެ މުއައްސަސާތަކުގެ ވެރިންނާއި، ޚާއްޞަ މަންދޫބުންނާއެކު ގާތްގަނޑަކަށް 40 އެއްހާ ބޭފުޅުން ބައިވެރިވެވަޑައިގަންނަވައެވެ.

މި މަހާސިންތާގައި ހުށަހެޅޭ ކަރުދާސްތަކާ ބެހޭ ގޮތުން މިއަދާއި މާދަމާ ވެސް ސެޝަންތައް ކުރިއަށްދާނެ ކަމަށް މަޢުލޫމާތު ލިބިފައިވެއެވެ.

ވަޒީރު އާދަމް ޝަރީފު ޢުމަރު އިތުރަށް ވިދާޅުވީ، އެ މަނިކުފާނަށް ބައިވެރިވެ ވަޑައިގެންނެވޭ ގޮތަށް މަހާސިންތާ ފެއްޓުމުގެ ރަސްމިއްޔާތުގެ ތާރީޚް ބަދަލުކޮށްދެއްވި ކަމަށް ޓަކައި ކޮޅުމަޑުލު އަތޮޅު ކައުންސިލުގެ ރައީސަށާއި، އެ ކައުންސިލުގައި ހިމެނިވަޑައިގަންނަވާ އެންމެހައި ފަރާތްތަކަށް ޝުކުރު އަދާކުރައްވާ ކަމަށެވެ.

މި މަހާސިންތާއަކީ ކޮޅުމަޑުލުގެ ތަރައްޤީއަށާއި، އެ އަތޮޅުގެ ރައްޔިތުންނަށް ދެވޭ ޚިދުމަތްތައް އިތުރަށް ހަރުދަނާކުރުމަށް މުހިންމު ބައްދަލުވުމެއް ކަމަށް ބެލެވެއެވެ. އަދި މިފަދަ މަހާސިންތާތަކަކީ ލާމަރުކަޒީ ނިޒާމު އިތުރަށް ވަރުގަދަކޮށް، ރަށްރަށުގެ ތަރައްޤީއަށް މަގުފަހިކުރުމަށް މުހިންމު ދައުރެއް އަދާކުރާނެ ކަމަށް އުންމީދުކުރެވެއެވެ.