ރާއްޖޭގެ މައްޝޫރު ދީނީ ޢިލްމުވެރިޔާ ޝައިޚް އަލީ ޒައިދު ފުލުހުންގެ އިދާރާއަށް މިރޭ ހާޒިރުވާން އަންގައިފިއެވެ.

"މިއަދުނޫހަށް" މައުލޫމާތު ދެއްވަމުން ޝައިޚް ވިދާޅުވީ، ފުލުހުންގެ އިދާރާއަށް ހާޒިރުވުމަށް އަންގާފައިވަނީ މިރޭ 20:30 އަށް ކަމަށެވެ.

މިކަމާއި ގުޅޭ ގޮތުން ޝައިޚު ޒައިދު މިއަދު ކުރެއްވި ޓްވީޓެއްގައި ވިދާޅުވެފައިވަނީ ފުލުހުން ތަހުގީގު ކުރާ މައްސަލައަކާއި ގުޅިގެން އެއިދާރާއަށް ހާޒިރުވުމަށް އަންގާފައިވާ ކަމަށެވެ.

މީގެއިތުރުން ޝައިޚް ވިދާޅުވެފައިވަނީ، އޭނާ ދެއްކެވި ވާހަކަތައް ޓްވިޓާ އިން ފެންނަން ހުންނާނެ ކަމަށާއި މީސްމީހުން ޝެއިޚްއޭ ކިޔައިގެން ދައްކާ ދޮގު ހަދައިގެން ދައްކާ ވާހަކަ ފަތުރާއިރު ފުލުހުން އެކަމަށް ފިޔަވަޅު ނުއަޅުއްވާ، ހާޒިރު ކުރަނީ ޝާއިޚް ކަމުގައެވެ.

"ތަހުގީގަކަށް އަޅުގަނޑު ފުލުހަށް ދިޔުމަށް އެބޭފުޅުން އެދިއްޖެ! ދެއްކި ވާހަކަ އެހުރީ ޓްވީޓްގައި. އޭގެ އިތުރުން މީސްމީހުން އަޅުގަނޑޭ ކިޔައިގެން ރޯ ބުހުތާން ދޮގު ހަދައިގެން ވާހަކަ ފަތުރާއިރު ފުލުހުން އެކަމަށް ފިޔަވަޅު ނުއަޅުއްވާ، ހާޒިރު މިކުރަނީ އަޅުގަނޑު. އަދުލުވެރިވެލައްވާ!" ޝައިޚް ޒައިދުގެ ޓްވީޓުގައި ވިދާޅުވެފައިވެއެވެ.

ދީނީ ޢިލްމުވެރިޔާ ފުލުހުންގެ އިދާރާއަށް ހާޒިރުވާން އަންގަފައިވީ ނަމަވެސް، ހާޒިރުކުރާ ވަކި ސަބަބެއް އަދި ސާފެއް ނުވެއެވެ.

Thahugeegakah alhugandu @PoliceMv ah dhiyumah ebeyfulhun edhijje! dhekki vaahaka eheree tweet gai. eyge ithurun mees meehun alhugandey kiyaigen roa buhuthaanu dhogu hadhaigen vaahaka fathuraairu police ekamah fiyavalhu naalhuhvai, haaziru mikuranee alhugandu. Adhuluveri velahvaa!

— Ali Zaid (@alizaid1000) January 13, 2019