އާރޓިކަލްކިޔުމަށް ހޭދަވާނެކަމަށް ބެލެވެނީ : 1 މިނެޓް, 56 ސިކުންތު
ކީރިތި ޤްރްއާނަށް ބަލާށެވެ! ހުރިހާ ނަބީ ބޭކަލުންނާއި ރަސޫލް ބޭކަލުންގެ ވާހަކަފުޅުތައް ބަޔާން ކުރައްވަވާފައެއް ނުވެއެވެ. ނަތީޖާއެއްގެ ގޮތުން ނަބީ ބޭކަލުންނާއި ރަސޫލް ބޭކަލުންގެ ފުރިހަމަ އަދަދުވެސް އަހަރެމެންނަށް އެނގޭކަށް ނެތެވެ. ހަމަ އެއާއިއެކު ނަބީބޭކަލުންނާއި ރަސޫލް ބޭކަލުން ނޫން މީހުންގެ ވާހަކަތައް ކީރިތި ޤްރްއާނުގައި ވަނީ ބަޔާން ކުރައްވަވައިފައެވެ.
އެއިގެ ތެރެއިން އެއް މިސާލަކީ ލުޤްމާންގެފާނެވެ. ލުޤްމާންގެފާނަކީ ރަސޫލްބޭކަލެއް ނޫނެވެ. އެފްރިކާއަށް ނިޞްބަތްވެވަޑައިގަންނަވާ ބޭކަލެކެވެ. ބުނެވޭގޮތުން ނިޞްބަތްވެވަޑައިގަންނަވަނީ ސޫދާނަށެވެ. ނަމަވެސް ދަރިންނަސް ދެއްވެވި ނަބޭޙަތްޕުޅުގެ ފުރިހަމަކަމުން އެކަމުގެ ވާހަކަތައް އެވަނީ ބަޔާން ކުރައްވަވައިފައެވެ. އަދި އެކަލޭގެފާނުގެ ނަންފުޅުގައި ސޫރަތެއްވެސް އެވަނީ ބާވައިލައްވަވައިފައެވެ.
މީސްތަކުންނޭވެ! ތިއަބައިމީހުންނަކީ ހެޔޮ އަމަލުތައްކޮށް ހެޔޮ ބަސް ބުނާ ބައަކު ކަމުގައި ވެއްޖެނަމަ ﷲ ތަޢާލާ އެމީހެއްގެ ވާހަކަ މަލާއިކަތް ބޭކަލުންނަށް ބަޔާން ކުރައްވަވާނެތެވެ.
ޙަދީޘްފުޅުން އެނގޭ ގޮތުގައި ﷲ ތާޢާލާ މަތިވެރިކުރުމަށް މީސްތަކުން އެއްވެއްޖެނަމަ އެކަމަށްޓަކައި ﷲ ތަޢާލާ ފަޚުރުވެރިވެވޮޑިގަންނަވައި އެކަން މަލާއިކަތް ބޭކަލުންނަށް ބަޔާން ކުރައްވަވަތެވެ. އެއީ ކީއްވެގެން ހެއްޔެވެ؟ ޝައިޠާނާ އެކަމަށް ހުރަސްއަޅަމުން ދަނިކޮށްވެސް މީސްތަކުން އެއްވެ ﷲ ތާޢާލާ މަތިވެރިކުރާތީއެވެ.
ﷲ ތަޢާލާ މަތިވެރި ކުރެވޭ ބައްދަލުވުންތަކުގައި ބައިވެރިވުމަކީ ކުޑަކަމެއް ކަމަށް ހީނުކުރާށެވެ! އަހަރެމެން ކޮންމެ މީހަކީ ކާކުކަމާއި އެމީހާގެ ނަން ވެސް ﷲ ތައާލާ ދެނެވޮޑިގެންވެއެވެ. މިސާލަކަށް އަހަރެންނަކީ ކާކުކަން އަހަރެންނަށްވުރެ މާބޮޑަށް ﷲ ތާޢާލާ ދެނެވޮޑިގެންވެއެވެ. ވީމާ ﷲ މަތިވެރިކުރެވޭ ބައްދަލުވުންތަކުގައި ވީހައި ގިނައިން ބައިވެރިވާށެވެ!
Advertisement
23 މެއި 2019