އަހަރެމެންގެ ތެރެއިން ވަރަށް ގިނަ މީހުންނަކީ މީހުން މަރަން ބިރު ގަންނަ މީހުންނެވެ. ނަމަވެސް ޒިނޭކުރަން ބިރުގަންނަ މީހުންގެ އަދަދު އިންތިހާއަށް މަދުވެއްޖެއެވެ. ވީމާ އެފަދަ މީހުން ކީރިތި ޤްރުއާނުގެ މިއާޔަތް ކިޔައި އުޅޭ ކަމާއިމެދު ސުވާލު އުފެދެއެވެ. 

"އެއުރެންނީ ﷲ އާއެކު އެހެން އިލާހަކަށް ގޮވައި ނަހަދާމީހުންނެވެ. އަދި ﷲ، ޙުރުމަތްތެރި ކުރައްވާފައިވާ ނަފްސެއް، ޙައްޤު ގޮތުންނޫނީ، ނުމަރާ މީހުންނެވެ. އަދި ޒިނޭ ނުކުރާ މީހުންނެވެ. އެއިން ކަމެއްކޮށްފިމީހާ (އެކަމުގެ) ޢުޤޫބާތާ ބައްދަލުކުރާނެތެވެ." (ފްރްޤާން: 68) 

އާޔަތުގެ ފުރަތަމަ ބައިގައި އެއޮތީ ހަމައެކަނި ﷲ ތަޢާލާއަށް އީމާންވެ ހަމައެކަނި ﷲ ތަޢާލާގެ ޙަޟްރަތުން ވާގިއެދުމުގެ ވާހަކައެވެ. ދެން އެއޮތީ ޝަރުޢީ ޙުކުމަކާއި ނުލައި މީހުން ނުމެރުމުގެ ވާހަކައެވެ. ތިން ވަނައަށް އެއޮތީ ޒިނޭ ނުކުރުމުގެ ވާހަކައެވެ. ވިދިގެން ބަޔާން ކުރައްވަވާފައި އެވަނީ ބަޔާން ކުރެއްވެވި 3 ކަންތަކުންކުރެ ކަމެއް ކޮށްފި މީހާއަށް ޙައްޤު ޢުޤޫބާތް ދެއްވަވާނެ ކަމުގެ ވާހަކައެވެ. 

މީސްތަކުންނޭވެ! މީސްތަކުން މިއަދު ޣާފިލުވެގެން ތިބި ނަމަވެސް ޒިނޭ ކުރުމުގެ ފާފައިގެ ދަރަޖަ މިއާޔަތުން އެއޮތީ ވަރަށް ސާފުކޮށް އެނގޭށެވެ! ދެން ބަލައިލަންވީ ﷲ ތަޢާލާ ދެއްވަވާނެ ގަދަފަދަ ޢުޤޫބާތަށެވެ! 

"---އަދި އަނިޔާވެރިވި މީހުންނަށް (އާޚިރަތް ދުވަހުގެ) ޢަޛާބް ފެންނަހިނދު، ހަމަކަށަވަރުން އެންމެހާ ބާރުތައް މިލްކުވެވޮޑިގެންވަނީ ﷲއަށް ކަމާއި އަދި ހަމަކަށަވަރުން اﷲ އީ ޢަޛާބް ދެއްވުމުގައި ގަދަފަދަވެވޮޑިގެންވާ ރަސްކަލާނގެކަން އެއުރެންނަށް އެނގޭނެ ނަމައެވެ." (ބަޤަރާ: 165) 

ﷲ ތައާލާގެ ގަދަފަދަ ޢަޛާބަށް ބިރުވެތިވާށެވެ! ޒިނޭ ކުރުމަކީ ބޮޑުވެގެންވާ ފާފައެއް ކަމާއި ޒިނޭ ކުރުމަށް ހުރީ ގަދަފަދަ ޢަޛާބުކަމަށް ޔަޤީންކުރާށެވެ! 

- އިސްލާމީ ތިލަފަތުގެ ދަރުސަކުން