ސައުތު އޭޝިއާ އިކޮނޮމިކް ފޯކަސްގެ އެންމެ ފަހުގެ އަދަދު، މޭކިން ޑީސެންޓްރަލައިޒޭޝަން ވާކް، އިން ދައްކާފައިވާ ގޮތުގައި، ރާއްޖޭގައި ތަރައްޤީކުރަމުން އައި ބައިނަލްއަޤްވާމީ އެއާޕޯޓާއި ބްރިޖުގެ މަސައްކަތް ނިމުމާއި ގުޅިގެން އިމާރާތްކުރުމުގެ ސިނާޢަތް މަޑުޖެހިފައިވާތީ ދިވެހިރާއްޖޭގެ އިޤްތިޞާދީ ކުރިއެރުން 2019 ވަނަ އަހަރު ހުންނާނެ ކަމަށް އަންދާޒާކުރެވެނީ  5.2 އިންސައްތައިގަ އެވެ. 

އެހެން ނަމަވެސް، އާ އިންފްރަސްޓްރަކްޗާ ވަޞީލަތްތައް ޤާއިމްކުރުމަށް އިންވެސްޓް ކުރުމާއި ފަތުރުވެރިކަމުގެ ސިނާޢަތް ފުޅާވެގެން ދިއުމުގެ ސަބަބުން، މިއަހަރު ރާއްޖޭގެ އިޤްތިޞާދީ ކުރިއެރުން އެވްރެޖްކޮށް 5.6 އިންސައްތަ އަށް އަރާނެ ކަމަށް ބެލެވޭ ކަމަށްވެސް އެ ރިޕޯޓީގައި ބުނެފައިވެއެވެ. 

ވެލާނާ އިންޓަރނޭޝަނަލް އެއާޕޯޓުގެ ނިމިފައިވަނީ ދެވަނަ ރަންވޭ އެޅުމުގެ މަސައްކަތްތެވެ. އަލަށް އަޅާ ޒަމާނީ ޓަރމިނަލް އެޅުމުގެ މަސައްކަތް މިހާރުވެސް ދަނީ ކުރެވެމުންނެވެ. މީގެ އިތުރުން ރާއްޖެ ތެރޭގެ ބައެއް ރަށްރަށުގައި އެއާޕޯޓްތައް ތަރައްޤީކުރުމުގެ މަސައްކަތްވެސް ދަނީ ކުރެވެމުންނެވެ.