ހިއުމަން ރައިޓްސް ކޮމިޝަން އޮފް މޯލްޑިވްސްގެ ޓީމަކުން، މާފުށީ ޖަލުގައި ފަސް އަހަރު ދުވަހުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަބްދުލްޤައްޔޫމާއި މިއަދު ވެސް ބައްދަލު ކުރައްވައިފިއެވެ.

ރައީސް ޔާމީން ޖަލަށްލާން ހުކުމް ކުރި ފަހުން އެންމެ ފުރަތަމަ އެޗްއާރްސީއެމް ގެ ޓީމަކުން އެމަނިކުފާނާއި ބައްދަލު ކުރައްވާފައިވަނީ އިއްޔެ ހެނދުނުގެ ވަގުތެއްގައި މާލޭ ޖަލުގައި އެމަނިކުފާނު ހުންނަވަނިކޮށެވެ.

އޭގެފަހުން މިއަދު ހެނދުނު މާފުށީ ޖަލުގައި އެޗްއާރްސީއެމް ގެ ޓީމަކުން ބައްދަލު ކޮށްފައިވާއިރު، މިއަދު އެކޮމިޝަނުން އެމަނިކުފާނާއި ބައްދަލު ކުރެއްވި ވަކި ސަބަބެއް އަދި ވަނީ ހާމަވާގޮތް ނުވެފައެވެ.

ރައީސް ޔާމީނާއި އެޗްއާރްސީއެމްގެ ޓީމަކުން އެންމެ ފުރަތަމަ ބައްދަލު ކޮށްފައިވަނީ، އެމަނިކުފާނު މާލޭ ޖަލުގައި ހުންނެވި ގޮޅީގެ ފެންވަރު ދަށް ކަމަށް ބުނެ، ރައީސް ޔާމީނުގެ ޤާނޫނީ ވަކީލުންގެ ޓީމުން އެކޮމިޝަނަށް ހުށަހެޅި މައްސަލައަކާއި ގުޅިގެންނެވެ.