އާރޓިކަލްކިޔުމަށް ހޭދަވާނެކަމަށް ބެލެވެނީ : 2 މިނެޓް, 2 ސިކުންތު
ދަރިން ނުލިބޭނަމަ ހޯދަން ކުރެވެން ހުރި މަސައްކަތްކުރުމަކީ އެންމެ ރަނގަޅު ކަމެކެވެ. މަސައްކަތްކުރުމުން ވެސް ނުލިބިއްޖެ ނަމަ އެއީ ކޯފާއެއް ކަމަށް ނުދެކޭށެވެ! އަދި ﷲ ތަޢާލާގެ ރަޙްމަތާއިމެދު މާޔޫސްނުވާށެވެ!
"މުދަލާއި ދަރިންނަކީ ދުނިޔޭގެ ދިރިއުޅުމުގެ ޒީނަތްތެރިކަމެވެ. އަދި ދެމިހުންނަނިވި ޞާލިޙް ޢަމަލު ތައް، ކަލޭގެފާނުގެ ވެރިރަސްކަލާނގެ ޙަޟްރަތުގައި ޘަވާބު ގެގޮތުން މާހެޔޮކަން ބޮޑެވެ. އަދި އެދޭ އެދުމެއްގެ ގޮތުން މާހެޔޮކަން ބޮޑުމެއެވެ." (އަލްކަހްފި: 46)
ބައެއް ދެމަފިރިންނަށް ދަރިން ނުލިބުމުން އެއީ ކޯފާއެއް ކަމަށްބުނެ އެމީހުންގެ ހިތްފަޅައިގެންދާ ފަދަ ބަސްތައް ބައެއް މީހުން ބުނާކަން އެއީ ވަރަށް ހިތާމަހުރިކަމެކެވެ. މިފަދަ ބަސްތަކުގެ ސަބަބުން ނިކަމެތިކަން އިޙްޞާޞްކުރަންޖެހުމަކީ ވަރަށް ގިނައިން މެދުވެރިވާ ކަމެކެވެ. ކުރިން މިބަޔާންކުރި އާޔަތުގައި ﷲ ތަޢާލާ އެފަދައިން ވަޙީކުރައްވަވާފައިވަނިކޮށް އަމިއްލައަށް ޙުކުމް ނެރުން ހުއްދަވެގެންވަނީ ކާކަށް ހެއްޔެވެ؟ އެމީހުންނަށް ކުދިން ނުލިބިގެން އުޅެނީ ކޯފާއިންކަން އެނގެނީ ކާކު ބުނެގެން ހެއްޔެވެ؟ ވީމާ އެފަދަ ބަސްތައް އެއްވެސް މީހަކަށް ނުބުނާށެވެ!
މުދަލާއި ދަރިންނަކީ ވެސް ދުނިޔޭގެ ޒީނަތެކެވެ! މުދައުވެސް ދަރިން ވެސް ދެއްވަވަނީ އިމްތިޙާނަކަށެވެ! ދަރިންގެ ކިބައިން އެންމެ ބޮޑަށް ބޭނުންވާނީ މުސްކުޅިވާދުވަހު އަޅައިލުމާއި އެހީތެރިކަމެވެ. މަރުވުމުން ހެޔޮދުޢާއެވެ. 10 ވަރަކަށް ދަރިން ތިބި ނަމަވެސް މައިންބަފައިންނަށް މިކަންކަން ޙާޞިލުވަނީ ކިތައް ދަރިންގެ ސަބަބުންހެއްޔެވެ؟ ވީއިރު ދަރިއަކު ނެތުމުން އުނިވަނީ ކޮންކަމެއް ހެއްޔެވެ؟ އެމީހަކަށް ފައިދާކުރާނީ ދަރިން ދެއްވެވުމުންކަން ނުވަތަ ނޫންކަން އެންމެ މޮޅަށް ދެނެވޮޑިގެންވަނީ ދަރިން ދެއްވަވާ ﷲ ތަޢާލާއެވެ!
އީމާންކަން އެންމެ ފުރިހަމަ އަންހެން ބޭކަނބަލުންގެތެރެއިން އެންމެ ފުރިހަމަ އެއް ބޭކަނބަލަކީ އެބޭކަނބަލަކަށް މާތް ﷲ ރަހްމަތް ލެއްވެވި އާސިޔާ ބިންތި މުޒަހިމް (ފިރުއަޢުނުގެ އަނބި) އެވެ. އެކަމަނާއަކަށްވެސް އެއްވެސް ދަރިއަކު ލިބިވަޑައިގެންފައެއް ނުވެއެވެ.
ރަސޫލް (ޞޢވ) އެންމެ ބޮޑަށް ލޯބިފުޅުވެވަޑައިގެން އަނބިކަނބަލަކީ ޢައިޝަތުގެފާނެވެ. އެކަމަނާއަކަށްވެސް ދަރިކަލަކު ލިބިވަޑައިގެންފައެއް ނުވެއެވެ. ވީއިރު އެއްވެސް މީހަކަށް ދަރިއަކު ނުލިބުމުން އެއީ ﷲ ތަޢާލާގެ ކޯފާއެއް ކަމަށް ބުނަންހެޔޮނުވާނެއެވެ!
"އުޑުތަކާއި، ބިމުގެ ވެރިކަންވަނީ ﷲ އަށެވެ. އެެކަލާނގެ އިރާދަކުރައްވާ އެއްޗެއް އެކަލާނގެ ހައްދަވަތެވެ. އެކަލާނގެ އިރާދަކުރައްވާ މީހަކަށް އަންހެންދަރިން ދެއްވަވަތެވެ. އަދި އެކަލާނގެ އިރާދަކުރައްވާ މީހަކަށް ފިރިހެންދަރިން ދެއްވަވަތެވެ." (އައްޝޫރާ: 49)
- މަޢުލޫމާތު: ޑރ. މުޙައްމަދު އިޔާޟް ޢަބްދުއްލަޠީފް
Advertisement
14 ޖުލައި 2020