އާރޓިކަލްކިޔުމަށް ހޭދަވާނެކަމަށް ބެލެވެނީ : 1 މިނެޓް, 17 ސިކުންތު
މިއަދު މީހެއްގެ ގާތު ޙާލު ކިހިނެއްތޯ ސުވާކުރުމުން ޖަޖަވާބުގައި "އަލްޙަމްދުލިﷲ" އެވެ ބުނާ މީހުން ބުނަނީވެސް ވަރަށް ބޮޑަށް ކަންނެތްވެ ހުރެއެވެ. ދުލުގައި ވާގިވެސް ނުހުންނަހައި ވަރުބަލިކަމާއި ފޫހިކަމާއިއެކުގައެވެ.
އެހެން އެވަނީ ކީއްވެގެންކަން އެނގޭހެއްޔެވެ؟ ހަމަ އެންމެ ސަބަބަކާއިހުރެއެވެ. ﷲ ތަޢާލާއަށް ޝުކުރުވެރި ނުވެވޭތީއެވެ؟ ދެއްވަވާފައިވާ ނިޢްމަތްތަކަށް ވިސްނައިވެސް ނުލެވޭތީއެވެ. ބޭނުންވާ އިތުރު ކަންކަން ގިނަވުމުގެ ސަބަބުންނެވެ.
މީސްތަކުންނޭވެ! ﷲ އަށް ޝުކުރުވެރިވުމަކީ އީމާންކަމުގެ އެންމެ މަތިވެރިދަރަޖައެވެ. އެހެނީ ﷲ ތަޢާލާއަށް ޝުކުރުވެރިވާ މީހާ އަޅުކަންކުރުން ގިނަކުރާނެއެވެ. ﷲ ތަޢާލާ ނަހީކުރެއްވެވި ކަންކަމާއި ދުރުހެލިވާނެއެވެ.
ޙަޤީޤަތަކީ މިއީކަމުގައިވުމުން ޝައިޠޯނާގެ އެންމެ ބޮޑު މަސައްކަތަކަށްވެފައި އޮންނަނީ މީސްތަކުން ﷲ ތަޢާލާއަށް ޝުކުރުވެރިވުމާއި ދުރުކުރުވުމެވެ. ދެއްވަވާ ނިޢްމަތްތަކަކީ އަމިއްލަ މަސައްކަތުން ލިބިގަންނަ ކަންކަންކަމަށް ވިސްނައިދިނުމެވެ.
އެކަމުގެ އެންމެ ބޮޑު ހެއްކަކީ މީހަކު މެދުވެރިކުރައްވަވައި ﷲ ތަޢާލާ ކިތަންމެ ބޮޑު އެހީތެރިކަމެއް ފޯރުކުރައްވަވައި ދެއްވެވި ނަމަވެސް ﷲ ތަޢާލާއަށް ޝުކުރުވެރިނުވެވޭކަމެވެ. އެމީހަކަށް ޝުކުރުވެރިވެ އަޅުވެތިވެވޭކަމެވެ. ﷲ ތައާލާއަށް ޝުކުރުވެރިވެ ސަޖިދަކުރުމުގެ ބަދަލުގައި އެމީހަކަށް ސަޖިދަޖަހާ ޙާލަތަށް ކަންކަންދާކަމެވެ.
މީސްތަކުންނޭވެ! ޙައްޤުމަގުގައި ސާބިތުވާން އެދޭމީހާ، ތަޤްވާވެރިކަން އިތުރުކުރަން އެދޭމީހާ، އާޚިރަތުގެ ސަލާމަތްކަމަށް އެދޭމީހާ، އަދި ދުނިޔޭގައިވެސް އުފަލާއި ތަނަވަސްރަޙްމަތަށް އެދޭމީހާ ﷲ ތަޢާލާއަށް ޝުކުރުވެރިވުން ގިނަކުރާށެވެ. އެކަމަށް ކަންނެތް ނުވެ ފަރުވާތެރިވާށެވެ!
- ޝައިޚް އަބޫބަކުރު ޒައުދުގެ ދަރުސަކުން
Advertisement
1 ޑިސެމްބަރ 2020