އާރޓިކަލްކިޔުމަށް ހޭދަވާނެކަމަށް ބެލެވެނީ : 1 މިނެޓް, 34 ސިކުންތު
ސުވަރުގެ ލިބުމަށް ނޭދޭނެ އެންމެ މުސްލިމަކުވެސް ނުހުންނާނެއެވެ. މުސްލިމަކަށްވުމުގެ ބޭނުމަކީވެސް ސުވަރުގެ ލިބުމެވެ. ނަމަވެސް މިއަދު ގިނަބައަކަށް މިވަނީ ތިމާ މުސްލިމަކަށްވި ސަބަބުވެސް ހަނދުމަބެތިކޮށްލެވިފައެވެ.
މުސްލިމަކަށް ސުވަރުގެ ލިބުމަށް އޮތް ހުރަހަކީ ﷲ ތަޢާލާ ނަހީކުރެއްވެވި ކަންކަން ކުރުމެވެ. އެކަން އެނގިހުރެމެ ތިމާ އެކަމެއް ކުރަން ބޭނުންވުމުން އެކަމަކީ ﷲ ތަޢާލާ ހުއްދަކުރެއްވެވިކަމެއްކަން ނުވަތަ ނަހީކުރެއްވެވިކަމެއްކަން ބަލައިވެސް ނުލައި ތިމާ ކުރަން ބޭނުންވާހއި ކަންކަން ކުރާނަމަ މުސްލިމަކަސްވި މަޤްޞަދު ކޮބައިހެއްޔެވެ؟ އެއޮތީ ދޫކޮށްލެވިފައި ނޫންހެއްޔެވެ؟
﴿وَلِمَنْ خَافَ مَقَامَ رَبِّهِ جَنَّتَانِ﴾ [الرحمن: 46]
މާނައީ: "އެމީހާގެ ވެރިރައްބުގެ ޙަޟްރަތުގައި ހުންނަންޖެހޭ ހުރުމާމެދު، ބިރުވެތިވެއްޖެ މީހާއަށް (ސުވަރުގޭގައި) ދެ ބަގީޗާ ހުށްޓެވެ."
ﷲ ތަޢާލާގެ ޙަޟްރަތުގައި ހުންނަންޖެހޭ ހުރުމަކީ ޤިޔާމަތްދުވަހު އެކަލާނގެ ހަޟްރަތުގައި ހުންނަންޖެހޭ ހުރުމެވެ. އެހުރުމަށް ބިރުވެތިވުމަކީ ﷲ ތަޢާލާގެ ޢަޛާބަށް ބިރުވެތިވުމެވެ. ހިސާބު ބެލެވި ތިމާއާއިމެދު ނިޔާ އިއްވެވޭނ ގޮތާއިމެދު ބިރުވެތިވުމެވެ. މިއާޔަތުން އެނގިގެންދަނީ އެކަންކަމަށް ބިރުވެތިވެއްޖެ މީހާއަށް ސުވަރުގެ އާއި ސުވަރުގެއިން 2 ބަގީޗާ ދެއްވަވާނެ ކަމެވެ.
އަދިވެސް ﷲ ތަޢާލާ ވަޙީކުރައްވަވާފައިވެއެވެ.
﴿وَأَمَّا مَنْ خَافَ مَقَامَ رَبِّهِ وَنَهَى النَّفْسَ عَنِ الْهَوَى [40] فَإِنَّ الْجَنَّةَ هِيَ الْمَأْوَى [41]﴾ [النازعات: 40، 41]
މާނައީ: "އަދި އެމީހާގެ ވެރިރައްބުގެ ޙަޟްރަތުގައި ހުންނަންޖެހޭ ހުރުމަށް ބިރުވެތިވެ، އެމީހެއްގެ ނަފްސު އަމިއްލަ އެދުންތަކުން ދުރުކޮށްފިމީހާ ދަންނާށެވެ! [40] ފަހެ، ހަމަކަށަވަރުން އެމީހާ އުޅޭނެ ތަނަކީ ސުވަރުގެއެވެ." 41.
ވީމާ ސުވަރުގެ އެދޭމީހާ އެމީހާގެ ނަފްސް އެދޭކަންކަމަށް ސަމާލުކަންދޭށެވެ. ނަފްސް ކިތަންމެ ވަރަކަށް އެދުނު ނަމަވެސް ﷲ ތަޢާލާ ނަހީކުރައްވަވާފައިވާ އެއްވެސް ކަމެއް ނުކުރާށެވެ!
- އިސްލާމީ ތިލަފަތުގެ ދަރުސަކުން
Advertisement
30 ޑިސެމްބަރ 2020