އާރޓިކަލްކިޔުމަށް ހޭދަވާނެކަމަށް ބެލެވެނީ : 2 މިނެޓް, 21 ސިކުންތު
ސުވަރުގެ ލިބުން އެދިގެން މަސައްކަތްކުރާ މީހާ ވަރަށް ހީވާގިވާންޖެހޭނެއެވެ. އެހެނީ ސުވަރުގެ ލިބެން އޮތީ ވަރަށް ހީވާގިކަމާއިއެކު މަސައްކަތްކޮށްގެންނެވެ. މި ބަޔާންކުރަނީ އެގޮތުން ކުރެވިދާނެ ބައެއް ޢަމަލުތަކެވެ.
1 މީސްތަކުންގެ މެދުގައި ސަލާމްފަތުރާ (ގިނަގިނައިން ސަލާމްކުރާ) މީހަކަށްވާށެވެ!
2 ނިކަމެތިންނަށް ކާންދޭށެވެ!
ގާތްތިމާގެ މީހުންނަށާ ރައްތެހިންނަށްވެސް އަދި ފަޤީރުންނަށްވެސް ކާންދޭށެވެ. އިތުރުވާތަކެތި އުކާނުލައި ބަންދުކޮށްލައިގެން ގެންގޮސްފަޤީރުންނަށް ކާންދޭށެވެ.
3 ރަޙިމުގެ ގުޅުން ދަމަހައްޓާށެވެ!
ޢާއިލާގެ މީހުންނަށް އެހީތެރިވާށެވެ! ހަސަދަވެރިނުވާށެވެ! ޚިޔލުތަފާތުވާ ކަމެއް އޮތް ނަމަވެސް ވާހަކަދައްކައި އަވަހަށް ޙައްލުކުރާށެވެ!
4 ދަމުނަމާދުކުރާށެވެ!
ދަމުނަމާދު ނުކުރާ މީހަކީ އެމީހަކަށް ﷲ ތަޢާލާ ދެއްވަވާ އެންމެ ބޮޑު ދައުވަތު ޤަބޫލުކުރަން ފަސްޖެހިގެން ހުންނަ މީހެކެވެ. އެކަމަށް ކަންނެތްވެ ނިދާފައި އޮވެގެން ﷲ ތަޢާލާގެ ރަޙްމަތަށް އެދޭކަމަސް ބުނެވޭނީވެސް ކިހިނަކުންހެއްޔެވެ؟ ދުޢާ ކުރަން އޮތް އެންމެ ރަނގަޅު ވަގުތު ކަމުގައިވާ ރޭގަނޑުގެ ފަހު ދަންފަޅީގައި ދުޢާނުކުރާ މީހަކަށް އެމީހާކުރާ ދުޢާ ޢިޖާބް ނުކުރައްވަވައިގެން ޝަކުވާކުރެވޭނީވެސް ކިހިނަކުން ހެއްޔެވެ؟
5 ބަލިމީހުންނަށް ޒިޔާތްކުރާށެވެ!
ބަލިމީހުންނަށް ޒިޔާރަތްކުރާށެވެ! އެމީހުންގެ ޙާލުބަލާށެވެ! ފޯރުކޮށްދެވެން އޮތް އެހީތެރިކަމެއް ފޯރުކޮށްދޭށެވެ! ބަލިމީހާއަށްޓަކައި ހެޔޮ ދުޢާކުރާށެވެ!
6 ﷲ ތަޢާލާއަށްޓަކައި މީސްތަކުންނާއި ބައްދަލުކުރާ މީހަކަށްވާށެވެ!
އެމީހަކަށް ވެވެން އޮތްވަރަކުން މީސްތަކުންނަށް ޒިޔާރަތްކުރާށެވެ! އެމީހަކީ ޢާއިލާގެ މީހަކަށްވީނަމަވެސް ނުވިނަމަވެސްމެއެވެ. އެކަމަކީ ﷲ ތަޢާލާއަށްޓަކައި ކުރާކަމަކަށް ހަދާށެވެ!
ސުވަރުގެ ޙާޞިލުކުރަން ކުރެވެން ހުރި މިފަދަ އެތައް ކަމެއް އެބަހުއްޓެވެ. ސުވާލަކީ މިފަދަ އެއްވެސް ކަމެއް، އެންމެ ޢަމަލެއްނަމަވެސް އެބަކުރަމުހެއްޔެވެ؟ ސުވަރުގެ އެދޭނަމަ ކުރަންވީ އެންމެ ޢަމަލެއް ނޫނެވެ. ކުރެވުނުހައި ގިނަ ޢަމަލެކެވެ. ﷲ ތަޢާލާ ޤަބޫލުފުޅު ކުރައްވަވާނީ ކުރެވޭ ކޮން ޢަމަލުތަކެއްކަން ހަމައެކަކަށްވެސް ނުއެނގޭނެއެވެ. ވީމާ އޮތީ ވީހައި ގިނަ ހެޔޮ ޢަމަލުތައް ކުރުމެވެ. އެކަމަށް ގަދައަޅައި މަސައްކަތްކުރާށެވެ!
- މުފްތީ މެންކުގެ ދަރުސަކުން
Advertisement
21 ޖެނުއަރީ 2021