އެސްޓީއޯ އަކީ ރާއްޖޭގައި އެންމެ ގިނަ ކުންފުނިތަކުގެ ބެލެނިވެރި ކުންފުނި ކަމަށްވާއިރު އެސްޓީއޯ އިން މިހާރުވެސް ގެންދަނީ ބޭރުގެ ކުންފުނިތަކާއިއެކު ބޮޑެތި އިންވެސްޓްމަންޓްތައް ކުރަމުންނެވެ. އެގޮތުން ސިމެންތި އުފައްދާ ލަފާޖަކީ ޚާއްޞަ ގޮތެއްގައި ފާހަގަކުރަންޖެހޭ ކުންފުންޏެކެވެ.
އެސްޓީއޯ އިން މިހާރު މަސައްކަތް ކުރަމުން ގެންދަނީ ސާފުނުކުރާ ތެޔޮ ގަނެގެން ސާފުކޮށް ރާއްޖޭގައި ތެލުގެ އަގު ހެޔޮ ކުރުމަށެވެ. މިކަމުގައި ސައުދީ އަރާމްކޯ އާއިއެކު މިހާރުވެސް ދަނީ މަޝްވަރާކުރަމުންނެވެ.
ޢާންމު ވިޔަފާރިއަށް ބަލައިފިނަމަ އެސްޓީއޯ އިން އެތެރެކޮށް މާކެޓްކުރަނީ ދުނިޔޭގެ އެންމެ މަޤްބޫލްކަން ލިބިފައިވާ އުފެއްދުންތަކެވެ. މާކެޓްކުރަމުން ގެންދަނީ ބާޒާރުގައި ލިބެން ހުންނަ އެންމެ ހެޔޮ އަގުތަކުގައެވެ. އަދި އެސްޓީއޯ އިން އާފްޓަރ ސޭލްސް ޚިދުމަތް ބައިނަލްއަޤްވާމީ ފެންވަރުގައި ދެމުން ގެންދާތީ އެކަމަށް އަންނަނީ ބޮޑު ތަރުޙީބެއް ލިބެމުންނެވެ.
ރާއްޖެއިން ބާއްވާ އިންވެސްޓްމަންޓް ފޯރަމްތަކުގައި ބައިވެރިވެ އެސްޓީއޯ އިން ގެންދަނީ އެކުންފުނީގައި އިންވެސްޓަރުންނަށް ހުރި ފުރުޞަތުތައް ހާމަކުރަމުންނެވެ.
