ސްޓެލްކޯގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެކުންފުނީގެ ޑިރެކްޓަރ އިބްރާހިމް ނިޒާމް ވިދާޅުވީ މެޓް މައުލޫމާތުތަކަށް ބަލައި، އަދި ސްޓެލްކޯގެ ހިސާބުތަކުން ދައްކާ ގޮތުގައި މިއީ އެންމެ ހޫނު ގަދަ ދުވަސްވރު ކަމަށާއި މިދުވަސްވަރު މިދިޔަ އަހަރާ އަޅާ ބަލާއިރު ކަރަންޓު ބޭނުންކުރާ އަދަދު ގާތްގަނޑަކަށް އިތުރުވެފައިވާ ކަމަށެވެ.
މިދިޔަ އަހަރުގެ މިދުވަސްވަރު 56 މެގަވޮޓްގެ ކަރަންޓު ބޭނުންކޮށްފައިވާއިރު މިއަހަރުގެ މިދުވަސްކޮޅު ކަރަންޓު ބޭނުން ކޮށްފައިވާ އަދަދު 58 މެގަވޮޓްއަށް އިތުރު ވެފައިވާ ކަމަށް ސްޓެލްކޯގެ ހިސާބުތަކުން ދައްކައެވެ.
މިދުވަސްކޮޅު ހޫނު ގަދަވިނަމަވެސް، ހޫނު ގަދަވުމުގެ ސަބަުން ކަރަންޓު ކެނޑުން ފަދަ މައްސަލައެއް ކުރިމަތި ނުވާނެ ކަމަށް ވެސް އެކުންފުނިން ބުނެފައިވެއެވެ.
މިއަދުގެ އެބައްދަލުވުމުގައި ވާހަކަ ދައްކަވަމުން ނިޒާމް ވިދާޅުވީ ކަރަންޓޫ ބިލް ބޮޑުވެގެން، ބިލް ދައްކަން އަންނަ މީހުންގެ ޝަކުވާ ލިބޭ ކަމަށާއި އެފަދަ ކަންކަން ބަލަމުންދާ ކަމަށެވެ.
ކަރަންޓު މީޓަރާއިމެދު ޝައްކުވާނަމަ އެކަމަށް ޚާއްސަ ފޯމު ފުރުމަށްފަހު ކަންބޮޑުވުންތައް ހުށަހެޅުމުގެ އިންތިޒާމް ވެސް ގާއިމްކޮށްފައިވާ ކަމަށް ނިޒާމް ވިދާޅުވިއެވެ.
