މިރޭ އަނެއްކާވެސް ބަލައިލަން މި މަސައްކަތްކުރަނީ އިބިލީސް އެންމެ ބޮޑަށް މާޔޫސްކޮށްލެވޭނެ އަދި ﷲ ތަޢާލާގެ ޙަޟްރަތުގައި އެންމެ ލޮބުވެތިކަންބޮޑު މީހަކަށްވެވޭނެ މަގަށެވެ. މިގޮތުން ކުރެވިދާނެ ވަރަށް ފައިދާހުރި ބައެއް ކަންކަން ކުރިންްވެސް ވާނީ ކިޔައިދީފައެވެ. މިރޭ މިކިޔައިދިނީ އިތުރުގޮތެކެވެ.
މީހަކު ބުރަ މަސައްކަތުން ކަމެއް ކާމިޔާބުކުރަނީއެވެ. އެކަން ޙާޞިލުވާއިރަށް އެކަން ގެއްލި ކުރި ހުރިހާ މަސައްކަތެއްވެސް ބޭކާރުވާނަމަ އެކަމެއް ކުރަން އެއްވެސް މީހަކު ބޭނުންވާނެހެއްޔެވެ؟ އަދި ކީއްހެއްޔެވެ؟ ތިބާ އެންމެ ރުޅި އަންނަ މީހާއަށް ގެއްލުންދޭން ކުރާ ކަންތަކުން އޭނާއަށް ފައިދާކުރާނަމަ އެކަމެއް ކުރަން އެއްވެސް މީހަކު ބޭނުންވާނެ ހެއްޔެވެ؟
އިބިލީހަށްވެސް ވަނީ މިފަދަ ގޮތެކެވެ. އެތައް މަސައްކަތެއްކޮށްގެން މީހަކު ލައްވައި ފާފަކުރުވަނީއެވެ. އެއީ އެއެއްޗަކީ އިންސާނާގެ އެންމެ ބޮޑު ޢަދާވާތްތެރިޔާ ކަމުގައިވާތީ ނަރަކައަށް ވެއްދުވުމަށެވެ. މިކަން ހުރިހާ މުސްލިމުންނަށްވެސް އެނގޭނެއެވެ.
ބުއްދިވެރިމުސްލިމުން މިކުރާކަމަކީ އިބިލީސް އެހައި މަސައްކަތްކޮށްގެން އޭނާ ލައްވައި ފާފަ ކުރުވާއިރަށް ތައުބާވަނީއެވެ. އެއިރުން ﷲ ތައާލާގެ ރުހިވޮޑިގަތުމާއި ލޯބިވެވޮޑިގަތުން އެމީހަކަށް ލިބިގެންދެއެވެ. އަދި އެމީހަކު ނަރަކައިން ސަލާމަތްކުރައްވަވައި ސުވަރުގެ ވައްދަވަތެވެ!
ވީމާ ގިނަގިނައިން ތައުބާވާނަމަ އަދި ފާފައެއް ކުރެވޭއިރަށް ތައުބާވުމަށް އަވަސްވެގަންނަ ނަމަ އެމީހަކާއި އިބިލީސް ދުރަށް ޖެހޭނެއެވެ. އެއީ އޭނާކުރާ މަސައްކަތް ބޭކާރުވެ (ފާފަކުރުވުމުން) ތައުބާވާ މީހުންގެ ދަރަޖަ ﷲ ތަޢާލާގެ ޙަޟްރަތުގައި އުފުއްލަވާތީއެވެ. ﷲ ތައާލާގެ ޙަޟްރަތުގައި އެންމެ ލޮބުވެތިކަން ބޮޑު މީހަކީ ގިނަގިނައިން ތައުބާވާ މީހުންނެވެ. އެއީ އޭނާއަށް ފާފައެއް ކުރެވުނު ނަމަވެސް އޭނާގެ ނިކަމެތިކަން ހަދާންވުމުން އެންމެ މަތިވެރިވަންތަ ﷲ ތައާލާއަށް ބިރުވެތިވެ ފާފަފުއްސަވައި ދެއްވެވުމަށް އެދި ދަންނަވާތީއެވެ!
ވީމާ އިބިލީސް އެންމެ ދެރަކުރަންވެސް އިބިލީހަކީ ތިބާ ފާފަކުރެތޯ ބަަލއި ހުރަސްއަޅާ އެއްޗަށް ހަދަންވެސް އަދި ﷲ ތަޢާލާގެ ޙަޟްރަތުގައި ދަރަޖަ އުފުލި މަތިވެރިވުމަށްވެސް ކުރަން އޮތްކަމަކީ ވީހައި ގިނައިން ތައުބާވުމެވެ. އަބަދުވެސް ތައުބާވުންމަތީގައި ދެމިހުރުމެވެ.
- އިސްލާމީ ތިލަފަތުގެ ދަރުސަކުން
