ސުވަރުގެ ވަންނަން އެދޭ މީހާ ވީހައި ގިނައިން ކީރިތި ޤުރްއާން ކިޔަވަންވީ ކީއްވެގެންތޯ ސުވާލުކުރާ މީހުންނަށް އަހަރެން ބުނަމެވެ. އެއީ އެފޮތަކީ ސުވަރުގެގޭގެވެސް އަދި ތިބާގެ ވެސް ވެރި ރައްބު ތިބާ ކިޔަވައި ޢަމަލުކުރަން ބާވައިލެއްވެވި ފޮތްކަމުގައިވާތީއެވެ! ސުވަރުގެ ވައްދަވާނީ އެ ފޮތް ކިޔަވައި އެއަށް ޢަމަލުކޮށްގެން ކަމުގައިވާތީއެވެ! ކިޔަވަންވީ އެއިގައި އޮތް އެއްޗެއް އުނގެނުމަށެވެ.
މީސްތަކުންނޭވެ! ރަމަޟާން މަހުގެ ދުވަސްތަކާއި ރޭތަކުގައި ކީރިތި ޤުރްއާން ކިޔެވުން ގިނަކުރާށެވެ. ނަމަވެސް ހަނދާނުގައި ބަހައްޓަންވީ ކީރިތި ޤުރްއާނަކީ ހަމައެކަނި ރަމަޟާން މަހު ކިޔަވަން ބާވައިލެއްވެވި ފޮތެއް ނޫން ކަމެވެ.
ލޮބުވެތި އަޚުންނާއި އުޚުތުންނޭވެ! ކީރިތި ޤުރްއާން އުނގެނުމުގެ ނިޔަތުގައި އެމީހަކަށް ވަގުތުލިބޭވަރަކުން ކިޔަވަމުން ގެންދާށެވެ! ދުވާލަކު އެންމެ އާޔަތެއް ނަމަވެސް މާނައާއިއެކު އުނގެނޭށެވެ. އެކަމުގައި ތިބާ ސާބިތުވެ ހުއްޓައި ތިބާ މަރުވެއްޖެނަމަ ޤުރްއާން އުނގެނެން މަސައްކަތްކުރި މީހަކަށް ދެއްވަވާނެ ޘަވާބު ތިބާއަށް ދެއްވަވާނެތެވެ! އިން ޝާ ﷲ
ކީރިތި ޤުރްއާން ކިޔެވުމާއި އުނގެނުމަށް ކުރާ މަސައްކަތް އިތުރުކުރާށެވެ! ތިބާއަށްޓަކައި އެ ޤުރްއާން ޤިޔާމަތް ދުވަހު ޝަފާއަތްތެރިވުމަށް އުންމީދުކުރާށެވެ! އެއަށްވުރެ ބޮޑު ނަޞީބަކީ ކޮބައިހެއްޔެވެ؟
ކުރިން މިބުނި މަގުން އުނގެނުމަށް މަސައްކަތްކުރާއިރު އެންމެ ބޮޑަށް ސަމާލުކަންދޭންޖެހޭނެ ކަމަކީ ޤަވާއިދުން ކޮންމެ ދުވަހަކު އެކަންކުރުމެވެ. އެމަސައްކަތަކީ ވަގުތުވާ ދުވަސްދުވަހު ކުރަން އޮތް ކަމަކަށް ނުހެދުމެވެ. ޝައުޤުވެރިކަން ހުރެގެން މަސައްކަތްކުރުމަކީ އެއީއެވެ. އެންމެ އާޔަތެއް ނަމަވެސް ކޮންމެ ދުވަހަކުވެސް އުނގެނެން މިބުނަނީ އެހެންވެގެންނެވެ.
އަހުރެންގެ ނަޞޭޙަތަކީ ކީރިތި ޤުރްއާން އުނގެނެން މަސައްކަތްކުރާ އަޅެއްގެ ގޮތުގައި ނޫނީ މަރުނުވުމެވެ. އެކަމުގެ ސަބަބުން އާޚިރަތް ދުވަހު ލިބެން އޮތް ބޮޑު ނަޞީބުން މަޙްރޫމްވާނެ މީހަކުކަމުގައިވެހުރެ މަރުނުވުމެވެ.
- މުފްތީ މެންކުގެ ދަރުސަކުން
