ރޯދަ ހިފުން މިކިޔަނީ ނިޔަތްގަތުމާއިއެކު ފަޖުރުލީންސުރެ އިރު އޮއްސިއްޖައުމަށް ދާންދެން ރޯދަގެއްލޭ އެންމެހައި ކަންކަމުން ދުރުހެލިވުމަށެވެ. ވީމާ ރޯދަ ގެއްލޭ ކަންތައްތަކުގެ ލިސްޓްގައި ތެދުވެރިވުން ނެތިދާނެއެވެ!
ނަމާދުނުކުރުންވެސް ނުއޮންނަފަދައިންނެވެ. ނަމާދުނުކުރާ މީހާ ހިފަންޖެހޭ އެއްވެސް ރޯދައެއް ނެތެވެ. ވީމާ އޭނާއަށް ހިފޭނެ ރޯދައެއްވެސް ނެތެވެ. ޤަބޫލުކުރަން މިޖެހޭ ކަމަކީ ހިފާ ރޯދަ، ރޯދައަކަށްވާނީ ﷲ ތަޢާލާގެ މަގުގައި ފިސާރި ރަނގަޅަށް ސާބިތުވެހުރެ ރޯދހިފުމުން ކަމެވެ.
"މިމައްސަރުގައި ﷲ سُبحَانَهُ وَتَعَالى އަޅުގަނޑުމެންނާ މިމިންވަރު ކޮށްދެއްވާފައިވާ މަތިވެރި ދަރުމައާއި، ޘަވާބު، ދިންނެވުމާއި ފުއްސެވުން ޙައްޤުވާ ބައަކުކަމުގައި ވޭތޯ އަޅުގަނޑުމެންގެ ނަފްސް ތަކަށް ތެދުވެރިވާންވާނެއެވެ! އަމިއްލަ ނަފްސްތަކަށް ތެދުވެރިވުމުގެ މާނައިގައި އެހެްނ އެންމެންނަށް ތެދުވެރިވުންވެސް ހިމެނެއެވެ. އަމާނާތްތެރި ވާންވާނެއެވެ!"
"އަދިވެސް ވަޤުތު ފާއިތެއް ނުވެއެވެ. އުންމީދު ކަނޑައިނުލާށެވެ! ހަމަ ޔަޤީނުންވެސް ﷲ سُبحَانَهُ وَتَعَالى މިމައްސަރުގައި މި މިންވަރު ކޮށްދެއްވާފައިވާ މަތިވެރިވެގެންވާ ދަރުމައާއި، ޘަވާބު އަޅުގަނޑުމެންގެ ތެރެއިން ހަމަ ކޮންމެމީހަކަށްވެސް މިންވަރުކޮށްދެއްވެވުން އެދިގެން މަސައްކަތްކުރަމާ ހިނގާށެވެ! އަދި އީމާންތެރިކަމާއިއެކު މިމައްސަރުގެ ފުރިހަމަ ދަރުމައާއި ޘަވާބަށް އެދި އަޅުގަނޑުމެން މި ރޯދައާއި، އަދި އެނޫންވެސް އަޅުކަންތައްތައް އަދާކޮށްފިކަމުގައިވާނަމަ ﷲ سُبحَانَهُ وَتَعَالى އަޅުގަނޑުމެންނަކީވެސް އެފަދަ ބައެއްކަމުގައި ލައްވާނެތެވެ! އިން ޝާ ﷲ"
- އިސްލާމީ ތިލަފަތުގެ ދަރުސަކުން
