މިދިއަ އަހަރު އަހަރެން ދިން ދަރުސްތަކުގައި އަހަރެން ބުނީމެވެ! "މި ނުރައްކާތެރި ވަބާއަކީ ދެމިއޮންނާނެ ވަބާއެއް ނޫނެވެ! ޙާލަތު ބަދަލުކުރައްވަވައި ދެއްވަވާނެތެވެ! އިން ޝާ ﷲ"
މިއަހަރު ބުނަން އޮތީ ޙާލަތު ވަރަށް ބޮޑުތަނުން ބަދަލުކުރައްވަވައި ދެއްވަވައިފިއެވެ. މިދިއަ އަަހަރު ޖަމާއަތުގައި ނަމާދު ނުކުރެވުނު ނަމަވެސް ޢީދު ފާހަގަނުކުރެވުނު ނަމަވެސް ޢީދު ސަލާމްކޮށް ނުލެވުނު ނަމަވެސް މިއަހަރު އިރާދަފުޅުން މިވަނީ ކަންކަން މުޅިންހެން ބަދަލުވެފައެވެ. ޖަމާއަތުގައި އެބަ ނަމާދުވެސް ކުރެވެއެވެ. ޢީދުވެސް ފާހަގަކުރެވޭނެއެވެ! އިން ޝާ ﷲ
އަހަރެންގެ ސުވާލަކީ ތިބާ ބަދަލުވެއްޖައިން ހެއްޔެވެ؟ ތިބާއަށް އައި ބަދަލަކީ ކޮބައިހެއްޔެވެ؟ އިތުރަށް ކުރަން ފެށީ ކޮން ހެޔޮކަމެއް ހެއްޔެވެ؟
މީސްތަކުންނޭވެ! މިއީ މިފަދަ ޙާލަތެއްގެ ނިމުމެއް ނޫނެވެ! އަދި ދުނިޔެއަށް ފޮނުއްވަވާނެ އެންމެ ފަހުގެ ބަލިމަޑުކަމެއް ނޫނެވެ. އެންމެފަހުން ކުރިމަތިކުރައްވަވާނެ މުޞީބާތެއްވެސް ނޫނެވެ! މުޞީބާތްތައް ދާނީ ކުރިމަތިވަމުންނެވެ! ދެން ކުރިމަތިކުރައްވަވާނީ ކޮންފަދަ މުޞީބާތެއް ކޮންގޮތަކަށްކަން ނުވެސް އެނގޭނެއެވެ.
ނަމަވެސް މުސްލިމުންނަށް އުންމީދެއް އެބައޮތެވެ! އެއީ ޙާލަތު ބަދަލުކުރަން މަސައްކަތްކުރުމުން ބަދަލުކުރައްވަވައި ދެއްވާނެ ކަމުގެ އުންމީދެވެ. ވީމާ ތައުބާވުން ގިނަކޮށް ހެޔޮ ބަދަލުތަކަށް އެދިގެން މަސައްކަތްކުރުމުން ހިންމަވައި ދެއްވަވާނެތެވެ! އިން ޝާ ﷲ
ކުރުކުރުކޮށް މިބުނެވުނީ ވަރަށް ގިނަ ވާހަކަތަކެކެވެ! ވިސްނައި ފިކުރުކުރާ މީހަކަށް ވަރަށް ގިނަ ވާހަކަތަކެކެވެ. ވީމާ އަހަރެންގެ ނަޞޭޙަތަކީ ވިސްނައި ފިކުރުކުރުމެވެ. މީގެ އެއްވެސް ރަމަޟާން މަހެއްގައި މަސައްކަތްނުކުރާވަރަށް މިމަހު މަސައްކަތްކުރާށެވެ! އަދި ރަމަމާން މަސް ނިމުމުންވެސް ހަަމއެގޮތުގައި ސާބިތުވާށެވެ! ހުރިހާ ކަންކަން ވެސް ހިންމަވައި ދެއްވަވާނެތެވެ! އިން ޝާ ﷲ
- ބިލާލް އައްސަދުގެ ދަރުސަކުން
