ﷲ ތަޢާލާއަށް ކުރަންޖެހޭ އަޅުކަން ނުކުރެވެނީ، އެކަލާނގެ ހަނދުމަކޮށް ޛިކުރު ނުކުރެވެނީ މަސައްކަތް ބުރަކަމުން ކަމަށް ބުނާ މީހުން ރަމަޟާން މަސް އައުމުން މިފަދަ އަޑުތައް އެތައް ގުނައަކަށް އިތުރުވެ އަޑުގަދަވެގެންވެސް ދެއެވެ!
މި މަރްޔަމްގެ ވާހަކަ އަބަދުވެސް ކިޔައިދެމެވެ. މިއަދުވެސް އަޑުއަހާށެވެ!
"މަރްޔަމް އަކީ ކުޑަކުޑަ 4 ދަރިން ގޮވައިގެން އެކަނި ދިރިއުޅެންޖެހިފައިވާ މައެކެވެ. ތަނެއްގައި ހަމަޖެހި، އިށީނދެލައިގެން އިނދެ ޛިކްރްކޮށްލާނެ އެއްވެސް ވަގުތެއް އޭނާއަކަށް ނުވެއެވެ. އެހާލުގައި މަރްޔަމް މަސައްކަތްކުރަމުން ގެންދާއިރުވެސް އަބަދުވެސް ހުންނަނީ ޛިކްރްކުރުން މަތީގައެވެ."
އަދިވެސް މަރްޔަމް ބުނެފައިވެއެވެ.
"ނިދިން ހޭލެވުނީންސުރެ ތަނެއްގައި އިށީނދެ އޮށޯވެލަން ފުރުޞަތު ލިބެނީ ހަމަ އެކަނި ދަރިފުޅަށް ބުއްދޭ ވަގުތު އެކަންޏެވެ! އެ ވަގުތުގައިވެސް ބަލަނީ ވީހައި ގިނައިން ޛިކުރުކުރެވޭތޯއެވެ!"
މަރްޔަމް ފަދަ އެކަނިވެރި ކިތައް އަންހެނުން ދުނިޔޭގައި އުޅޭނެތޯއެވެ؟ މިހިރީވެސް ހަމަ އިންސާނުން ދިރިއުޅެމުން ގެންދާ ހާލެވެ. ގޭތެރޭ މަސައްކަތްކުރަމުން ދަރިންބަލަމުންވެސް މަރްޔަމް އެބަލަނީ ވީހައި ގިނައިން ހެޔޮ އަމަލުކުރެވޭތޯއެވެ. އިތުރު އެންމެ ހެޔޮ ޢަމަލެއްކޮށްގެންވެސް ރޯދައިގެ ޘަވާބު އިތުރުކުރެވޭތޯއެވެ! މަރްޔަމްއަށް ދެއްވަވާނެ ސަވާބާއިމެދު ނިކަން ވިސްނައިލަބަލާށެވެ!
ނަމަވެސް ހުރިހައި ކަމެއް ﷲ ތަޢާލާ ފުރިހަމަކޮށްދެއްވަވާފައި ތިބޭ ގިނަ ބައަކަށް މިއުޅެނީ ހޭލީންސުރެ ނިދަންވާއިރުވެސް ﷲ ތަޢަލާގެ މަތިން ހަނދާންކޮށްލާނެ ވަގުތެއް ނުވެގެންނެވެ. ރޯދަވީއްލަންވާއިރުވެސް އުޅެނީ ކީރިތި ޤުރްއާނުން އެންމެ އަކުރެއްވެސް ކިވަވައި ނުލުވިގެންނެވެ.
ލޮބުވެތި އަޚުންނާއި އުޚުތުންނޭވެ! ހަމަ މިވަގުތުން ފެށިގެންވެސް ވިސްނައި ފިކުރުކުރަން ފަށާށެވެ! ކިތަންމެ ދަތި ހާލުގައި އުޅުނު ނަމަވެސް ވީހައި ގިނައިން ހެޔޮ އަމަލުކުރެވޭތޯ ގަދައަޅައި މަސައްކަތްކުރަން ފަށާށެވެ! އިސާހިތަކު ހިތްހަމަޖެހުން ލިބެންފަށާނެއެވެ! އުފާވެރިކަންވެސް ލިބެން ފަށާނެއެވެ! މަރުވުމުން ލިބޭނެ ނިޢްމަތްތައް އަދި މާގިނަވާނެއެވެ!
ފަށަމުން ރޯދަފަލަކުރުމުގެ ވާހަކަބުނީމާ އެކަމާވެސް ބައަކު ސުވާލު އުފައްދައިގެން ތިބެދާނެތީ ބުނެލަމެވެ. އެއިގެ މާނައަކީ ރޯދައަށް ބޭނުންވާ ދުޅަހެޔޮކަން ވީހައި ބޮޑަށް ހޯދައިދިނުމެވެ. އެކަންކުރެވޭނީ ރޯދައަށްހުރެ އަޅުކަންކުރިވަރަކުންނެވެ!
- އިސްލާމީ ތިލަފަތުގެ ދަރުސަކުން
