އިންސާނުންގެ ދިރިއުޅުން ހަމަޖެހިފައި މިވަނީ ކޮންމެ ކަމެއްގައިވެސް ﷲ ތަޢާލާގެ ޙަޟްރަތުގައި ދަންނަވައިގެން ނުވަތަ ދުޢާކޮށްގެން ބޭނުންތައް ފުއްދަންޖެހޭނެ ގޮތަށެވެ. ވީމާ ދުޢާކުރުމަކީ ކޮންމެ ދުވަހަކުވެސް ގިނަގިނައިން ކުރަންޖެހޭ ކަމެކެވެ. މި ބަޔާންކުރަނީ ދުޢާ ޢިޖާބަކުރައްވަނިވި 13 މަޤާމެކެވެ.
1 ليلة القدر ވިލޭރޭ.
2 ރޭގަނޑު ދަންވަރުގެ ފަހުބާއި.
3 ކޮންމެ ފަރުޟު ފަސްނަމާދެއްގެ ފަހުގައި.
4 ބަންގި އާއި ގަމަތާއި ދެމެދު.
5 ފަރުޟު ފަސްނަމާދަށް ގޮވާލެވޭހިނދު.
6 ވާރޭ ވެހޭ ހިނދު.
7 ހަނގުރާމައިގައި އެއްބަޔަކު އަނެއްބަޔަކާއި ކުރިމަތިލާ ހިނދު.
8 ހުކުރު ދުވަހުން ބައެއްގައި. ( އެންމެ ރާޖިޙު ގޮތްތަކުގެ ތެރޭގައި : * އެއީ ހުކުރު ދުވަހުގެ އަސުރު ވަގުތުގެ ފަހުބައިގައި ކަމަށް ބުޚާރީ އާއި މުސްލިމްގެ ރިވާޔަތުގަ ވާރިދުވެގެންވޭ.
* ނުވަތަ އިމާމް މީހާ މިންބަރަށް އަރައިވަޑައިގެން އިށީންނަ އިރުން ފެށިގެން ނަމާދު ނިމެންދެންނެވެ.)
9 ސަޖިދާގަވާ ވަގުތު.
10 ޢަރަފާތު ދުވަހު ކުރެވޭ ދުޢާ.
11 މައިންބަފައިން ދަރިންނަށް އަދި ދަރިން މައިންބަފައިންނަށް ކުރާ ދުޢާ.
12 ދަތުރުކުރާއިރު ދަތުރުވެރިޔާގެ ދުޢާ.
13 ރޯދަވީއްލާއިރު ކުރެވޭ ދުޢާ.
ބައެއް ދީންތަކުގައި ދުޢާކުރަންވުމުން ވަކިތަންތަނަށް ދާންޖެހެއެވެ. ވަކިއެއްޗެއްގެ ކުރިމަތީގައި ހުއްޓެންޖެހެއެވެ. ނަމަވެސް މުސްލިމުންނަށް މިފަދަ ކަންކަން ކުރާކަށް ނުޖެހެއެވެ!
މުއުމިނުން ކޮންމެތާކުވިޔަސް ކޮންމެހާލެއްގައި ވިޔަސް الله سبحانه و تعالى އަށް ދުޢާކުރުމުގައި ދެމިތިބޭށެވެ!
قال الله تعالى " وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ"
"އަދި ތިމަންރަސްކަލާނގެއާމެދު ތިމަންރަސްކަލާނގެ އަޅުން ކަލޭގެފާނާ سؤال ކޮށްފިނަމަ، (ކަލޭގެފާނު ވިދާޅުވާށެވެ!) ފަހެ، ހަމަކަށަވަރުން ތިމަންރަސްކަލާނގެއީ (އެއުރެންނާ) ކުއްތަންވެ ވޮޑިގެންވާ ރަސްކަލާނގެއެވެ. ތިމަން الله ގެ حضرة އަށް دعاء ކޮށްފިނަމަ دعاء ކުރި މީހާގެ دعاء ތިމަންރަސްކަލާނގެ އިޖާބަ ކުރައްވަމެވެ. ފަހެ، އެއުރެން (އެބަހީ: ތިމަންރަސްކަލާނގެ އަޅުން) ތިމަންރަސްކަލާނގެއަށް އިޖާބަދޭހުށިކަމެވެ! އަދި އެއުރެން ތިމަން ރަސްކަލާނގެއަށް إيمان ވާހުށިކަމެވެ! (އެއީ) އެއުރެންނަށް ތެދުމަގު ލިބުމަށްޓަކައެވެ."
- އިސްލާމީ ތިލަފަތުގެ ދަރުސަކުން
