އެއްބައަކު އުޅެނީ އެމީހުންނަށް ދެއްވެވި ދަރިން ގިނަވެ ނުބެލެހެއްޓިގެންނެވެ. ތަރުބިއްޔަތުނުކުރެވިގެންނެވެ. އަނެއްބައަކަށް އުޅެންޖެހިފައިވަނީ ދަރިންނަށް ބޭނުންވި ނަމަވެސް ދަރިން ނުލިބިގެން އެކަމުގެ ކަންބޮޑުވުމުގެތެރޭގައެވެ.
އެހެން އެކަންވުމަކީ ކަންބޮޑުވާންޖެހެންވީ ކަމެއް ނޫނެވެ. މިއީ ދުނިޔެއެވެ. އެއްބައަކު އުފަލުގައި ތިބޭއިއިރު އަނެއްބައަކު ތިބޭނީ ނުތަނަވަސްކަމުގައެވެ. އެއީ މިއީ ދުނިޔެކަމަށްވީތީއެވެ.
ދަރިން ނުލިބިގެން އެކަމުގެ ކަންބޮޑުވުމުގައި ތިބި މީހުންނަށްވެސް ބުނެލަންއޮތީ ކުރިއަށް މިދަނީ ރަޙްމަތުން ފުރިގެންވާ ދުވަސްތެކެވެ. މީސްތަކުން ދުޢާ ޢިޖާބަކުރައްވަވާ މޫސުމެވެ. މިފަދަ ދުޢާތައް ކުރަމުން ގެންދާށެވެ! ﷲ ތަޢާލާ ހިންމަވައި ދެއްވަވާނެތެވެ! އިން ޝާ ﷲ
رَبِّ هَبْ لِي مِنْ لَدُنْكَ ذُرِّيَّةً طَيِّبَةً إِنَّكَ سَمِيعُ الدُّعَاءِ- آل عمران: ٣٨
އަޅު ހައްދަވާ ގެންގުޅުއްވާ އިލާހް! އިބަރަސްކަލާނގެ ޙަޟްރަތުން ހެޔޮލަފާ ރަނގަޅު ދަރިފަސްކޮޅެއް މިއަޅާއަށް ދެއްވާނދޭވެ! ހަމަކަށަވަރުން އިބައިލާހީ ދުޢާ އައްސަވާވޮޑިގެންވާ އިލާހެވެ.
رَبِّ هَبْ لِي مِنَ الصَّالِحِينَ – الصافات: ١٠٠
އަޅު ހައްދަވާ ގެންގުޅުއްވާ އިލާހް! މިއަޅާއަށް ޞާލިޙުންގެ ތެރެއިންވާ ދަރިޔަކު ދެއްވާނދޭވެ!
رَبِّ لَا تَذَرْنِي فَرْدًا وَأَنْتَ خَيْرُ الْوَارِثِينَ- الأنبياء: ٨٩
އަޅު ހައްދަވާ ގެންގުޅުއްވާ އިލާހް! މި އަޅާއަކީ (ދަރިޔަކުނެތް) އެކަނިވެރި މީހެއްކަމުގައި ނުލައްވާނދޭވެ! އަދި އިބަރަސްކަލާނގެއީ އެންމެ ހެޔޮގޮތުގައި ވާރުތަކުރައްވާ ކަލާނގެއެވެ،
- އިސްލާމީ ތިލަފަތުގެ ދަރުސަކުން
