މިއަދު ގިނަ ބައަކު ކަންބޮޑުވަނީ އެހެން މީހަކު ނުވަތަ އެހެން ބައަކު ކުރާ ކަންކަމަށެވެ. ދައްކަނީ އެވެނި މީހަކު މިވެނިކަމެއްކުރި ވާހަކައެވެ. އެކަންކަމަށްވެސް ކަންބޮޑުވާށެވެ. އެމީހުންނަށްޓަކައި ހެޔޮދުޢާކުރާށެވެ! ރަނގަޅު ގޮތް ބުނެދީ ހަނދާންވެސް ކޮށްލައިދޭށެވެ.
އެހެންކަމާއިއެކުވެސް ބޮޑަށް ބިރުގަންނަންވީ ތިމާގެ ޙާލާއިމެދުގައެވެ. ތިމާއަށް ކުރެވޭ ކަންކަމާއިމެދުގައެވެ. އެހެން މީހަކު ކުރިކަމަކާއިބެހޭ ގޮތުން ތިބާއަކާއި ސުވާލެއް ނުކުރައްވަވާނެތެވެ. ތިބާ އާއި ސުވާލުކުރައްވަވާނީ ތިބާ ކުރި ކަންކަމާއިބެހޭގޮތުންނެވެ. ތިބާކުރަންޖެހޭ ކަންކަމުގެ ތެރެއިން ނުކޮށް ދޫކޮށްލި ކަންކަމާއިބެހޭގޮތުންނެވެ.
އެގޯޅީގައި ނުވަތަ މިވެނި ގެއެއްގައި އުޅޭ މީހާ ކުރިކަންކަމާއި އަދި އޭނާގެ ފޯނު ބޭނުންކުރިގޮތާއިބެހޭގގޮތުން ތިބާއާއި ސުވާލެއް ނުކުރައްވަވާނެތެވެ. ސުވާލުކުރައްވަވާނީ ހަމަ ތިބާ ކުރި ކަންކަމާއިބެހޭ ގޮތުންނެވެ!
މިއާޔަތަށް ވިސްނާށެވެ!
"އޭ އީމާންވެއްޖެ މީސްތަކުންނޭވެ! ތިޔަބައިމީހުންގެ އަމިއްލަ ނަފްސް ތައް ރައްކާތެރިކޮށް، އިޞްލާޙްކުރާށެވެ! ތިޔަބައިމީހުންނަށް ތެދުމަގު ލިބިއްޖެނަމަ، މަގުފުރެދުނު މީހުންގެ ކިބައިން، ތިޔަބައިމީހުންނަށް ގެއްލުމެއް ނުލިބޭހުށްޓެވެ. ތިޔަބައިމީހުން އެންމެން އެނބުރިދިއުންއޮތީ، ﷲ ގެ ޙަޟްރަތަށެވެ. ފަހެ، އޭރުން ތިޔަބައިމީހުން ކޮށްއުޅުނު ކަންތަކުގެ ޚަބަރު، ތިޔަބައިމީހުންނަށް އެކަލާނގެ އަންގަވާނެތެވެ." (އަލް މާއިދާ: 105)
މުފްތީ މެންކުގެ ދަރުސަކުން
