1 ކޮންމެ މީހަކީވެސް ކޮނަމެ ދުވަހަކުވެސް ކޮންމެވެސް މަސައްކަތްތަކެއް ކުރަންޖެހޭނެ މީހެކެވެ. އެކަންކަމަށް ވަގުތު ތާވަލުކުރާ އުޞޫލުން ޤުރްއާން ކިޔެވުމަށްވެސް ވަގުތުކޮޅެއް ތާވަލުކުރާށެވެ.
2 މަސައްކަތް ހުންނަ ގޮތުން އެއްފަހަރާ ގިނަ ވަގުތުތަކެއް ހޭދަނުކުރެވޭ މީހާ ކޮންމެ ނަމާދަކަށްފަހުގައިވެސް ކޮންމެވެސް މިނަވަރަކަށް ކިޔަވާށެވެ. \
3 ގޭގައި ޤުރްއާން ކިޔަވާނަމަ ގޭގައި މީހުން މަދުވާނެ ވަގުތަށް ސަމާލުކަންދޭށެވެ. އެހެނީ ކީރިތި ޤުރްއާނަކީ ﷲ ތަޢާލާގެ ކަލާމްފުޅެވެ. ވީމާ ކިޔަވަންވާނީ އަވަސް އަރުވާލައި ނުވަތަ ތެޅިފޮޅިގަނެގެނެއް ނޫނެވެ. ކިޔަވާ އެއްޗެއް ތިމާގެ ވިސްނުމަށް ގެނެވޭނެ ގޮތަކަށެވެ.
4 ގޭގައި އުޅެނީ ހަމައެކަނި ތިމާ އާއި އަމިއްލަ ޢާއިލާ ނަމަ ޤުރްއާން ކިޔަވާ ވަގުތަކީ އެންމެން އެކުގައި ތިބެ ކިޔަވާނެ ވަގުތަކަށް ހަދާށެވެ. އެއިރުން ބޭކާރު އަޑުތައް އިވުމުން ސަލާމަތްވެވޭނެއެވެ.
5 ޤުރްއާން ކިޔެވުމަކީ ވަގުތުވާވަރަކުން ކުރާކަމަކަށް ނުހަދައި އެއީވެސް ކުރާ އެހެން ކަންކަން ފަދައިން ވަގުތު ހޯދައި ވަގުތު ކަނޑައަޅައިގެން ކުރާ ކަމަކަށް ހަދާށެވެ.
6 ޤުރްއާން ކިޔަވަން އިށީންނަންވާނީ ސިކުނޑިން އެހެންކަންކަން ބޭރުކޮށްލައިގެންނެވެ. ސިކުނޑި އެކަމަށް ހުސްކޮށްލައިގެންނެވެ.
7 ޤުރްއާން ކިޔަވަން އިށީނދެ ފުރަތަމަ ކަމަކަށްވެސް އަޢޫޛް ބިސްމި ކިޔަވައި ކިޔަވާ އެއްޗެއް ތިމާއަށް ފަހުމްކޮށްދެއްވެވުން އެދި ދުޢާކުރާށެވެ. އަދި ކިޔަވައި ނިމިގެން އެ ޢަމަލު ޤަބޫލުފުޅު ކުރެއްވެވުން އެދިގެން ދުޢާކުރާށެވެ.
8 ވީހައި ގިނައިން ޤުރްއާން، މާނައާއިއެކު އަޑުއަހަން މަސައްކަތްކުރާށެވެ.
9 ލޮލަށް ފެނުމުގެ ބާރު ލިބިފައިވާ މިންވަރަށް ބަލައި ކިޔަވަން އެންމެ ފަސޭހަ ސައިޒުގެ އަކުރުން ލިޔެފައިވާ ޚަޠިމަކުން ކިޔަވާށެވެ. ފޯނުން ކިޔަވާނަމަ ފަސޭހަ ސައިޒަކަށް ފޮންޓް ބަހައްޓާށެވެ.
10 ކޮންމެ ދުވަހަކުވެސް ކިޔަވާނެ މިންވަރެއް ކުރިން ކަނޑައަޅާށެވެ. ކޮންމެ ގޮތަކުން ނަމަވެސް އެދުވަހަކު ކިޔަވަން ޖެހޭ ބައެއް އަނެއް ދުވަހަށް ނުބާއްވާށެވެ! މަދުވެގެން ރަމަޟާން މަސް ނިމެންވާއިރަށް މާނަކިޔަމުން 1 ޚަތިމް ކުރަން މަސައްކަތްކުރާށެވެ.
މިކަންކަމަށް ސަމާލުކަންދީފިނަމަ އެކަމުގެ ފައިދާ އެމީހަކަށް ކުރާނެއެވެ. އިން ޝާ ﷲ
