ކޮންމެ ބައްޕައަކުވެސް އެދޭނީ އޭނާގެ އަންހެން ދަރިފުޅަށް ވީހައި ހެޔޮލަފާ ފިރިއަކު ލިބުމަށެވެ. އެއްވެސް ބައްޕައަކު އޭނާގެ އަންހެން ދަރިފުޅު ނުބައި ނުލަފާ އަނިޔާވެރި ޖައްބާރަކާއި ގުޅުމަކަށް ނުއެދޭނެއެވެ. ނަމަވެސް އޭނާ އޭނާގެ އަނބިމީހާއާއިމެދު ޢަމަލުކުރަނީ ނުބައިމަގުންނެވެ. ދުލުން ނުބައި ބަސްތައް ބުނަނީއެވެ. އަތުން އަނިޔާވެރިވަނީއެވެ. ޚިޔާނާތްތެރިވަނީއެވެ.
އެފަދަ މީހުން އިތުރަށް ވިސްނައިލާށެވެ!
"ތިބާގެ އަންހެން ދަރިންނަށް ހެޔޮލަފާ ފިރިއަކު ލިބުމަށް އެދޭ ފަދައިން ތިބާގެ އަނބިމީހާއަށް އެފަދަ ފިރިއަކު ކަމުގައި ތިބާ ވާށެވެ!" --ޑރ. މުޙައްމަދު އިޔާޟް ޢަބްދުއްލަޠީފް
މިފަދަ ބަސްތަކާއި މިމޭރުމުން ދެވިފައި ހުންނަ ދަރުސްތަކާއި ގުޅިގެން ފިރިހެން ބޭފުޅުންވެސް ސުވާލު އުފައްދަވައެވެ. "އަނބިން ފިރިންނަށް ހެޔޮވާން، އޯގާތެރިވާން، ވަފާތެރިވާން، އެހީތެރިވާން ނުޖެހޭނެތޯއެވެ؟"
ޖަވާބުގައި ޢިލްމުވެރިން ވިދާޅުވަނީ ދެމަފިރިން ވެސް އެކަކު އަނެކަކަށް ހެޔޮލަފާވާން ޖެހޭނެ ކަމަށެވެ. އަދި ދެއްވާ ދަރުސްތަކުގައި އެކަން ފާހަގަވެސް ކުރައްވައެވެ.
ޤަބޫލުކުރަން އުނދަގޫވި ނަމަވެސް އިސްލާމީ ޤައުމުތަކުގައި މިހައިތަނަށް ކުރެވިފައިވާ ގިނަ ދިރާސާތަކުން ދައްކާ ގޮތުގައި ގިނަ ކައިވެނިތައް ރޫޅެން މެދުވެރިވާ ސަބަބަކީ ފިރިމީހާގެ މައްސަލަތަކެވެ. އަދި ކައިވެނި ރޫޅުމުން ގިނައިން، ބޮޑަށް ގެއްލުން ލިބި ނިކަމެތިވަނީވެސް އަނބިންނެވެ.
މިކަމުގެ ހެއްކަކަށް ސައުދިއަރަބިޔާގައި ދެވަނަ ކައިވެންޏެއް ނުކުރެވިފައި ތިބި އަންހެނުންގެ އަދަދު 2 މިލިއަނަށްވުރެ ގިނަކަން ފުދެއެވެ. ޔޫއޭއީގައިވެސް ޙާލު ހުރީ ހަމަ މިފަދަ ގޮތަކަށެވެ. އެކަމުގެ ސަބަބުން މުޖުތަމައުއަށް ކުރާ ނޭދެވޭ އަސަރު ކުޑަ ކުރުމަށްޓަކައި ސަރުކާރުތަކުން މިހާރު ގެންދަނީ އެފަދަ އަންހެނުންނަށް އަލުން ކައިވެނިކުރެވޭނެ މަގުފަހިކޮށްދިނުމަށްޓަކައި އެފަދަ އަންހެނުންނާއި ކައިވެނިކުރުމުން އިނާޔަތްވެސް ދެމުންނެވެ. ދެއަންތބަށް ކައިވެނިކުރަންވެސް ހިތްވަރުދެމުންނެވެ. ފިރިހެނުންނަށް މިފަދަ މައްސަލަތައް ކުރިމަތިވެގެން އުޅޭކަން ފާހަގަކުރެވިފައެއް ނުވެއެވެ.
ރާއްޖެއަށް ބަލައިފިނަމަ ޙާލަތު ތަފާތުވެދާނެއެވެ. އެއީ ގަދަކަމުން ފިރިން ގާތުން ވަރިވެ ޒުވާން ބަންގާޅީންނާއި "ގުޅޭ" އަންހެނުންގެ އަދަދު އިތުރުވަމުންދާތީއެވެ. އޮފީސް ލޯބި ގަދަވެ ރޫޅޭ ކައިވެނިތައް އިތުރުވަމުންދާތީއެވެ.
