މިއަދުގެ ޙާލަތަށް ބަލައިފިނަމަ ފިރިހެނެކޭ ބުނާއިރަށް ވިއްދައިގެން ފަހަތުން ބުނެވެނީ މަކަރުހަދާނޭއެވެ. މި ދަރުސްގައި ބަލާލަން މިއުޅެނީ ތެދުވެރިވުމުގެ މުހިންމުކަމުގެ މައްޗަށެވެ. ކުރާ މުޢާމަލާތުތަކުގައި ތެދުވެރިވުމުގެ މުހިންމު ކަމުގެ މައްޗަށެވެ.
ޚަދީޖަތުގެފާނު ރަސޫލް ﷺ އާއި ކައިވެނިފުޅު ބައްލަވައިގަންވަވަން ބޭނުންފުޅުވެ އެކަން ހުށަހެޅުއްވެވީ ރަސޫލްކަން ލިބިވަޑައިގަތުމުގެ މާކުރިންނެވެ. އެހެނަސް ރަސޫލް ﷺ ގެ ތެދުވެރިކަން ބޮޑުކަން އެނގިވަޑައިގަތުމުންނެވެ. އެކަން އެނގިވަޑައިގަތީ އެކަމަނާގެ ވިޔަފާރި ޤާފިލާއެއް ޙަވާލުކުރައްވަވައި ޝާމްކަރައަށް ފޮނުއްވެވުމުން ރަސޫލް ﷺ ދައްކަވައިދެއްވެވި ތެދުވެރިކަން ބޮޑުވުމުންނެވެ.
މިއީ މިއަދުވެސް އަހަރެމެން ވިސްނައި ފިކުރުކުރަންޖެހޭނެ ކަމެކެވެ. ކުރާ ކޮންމެ މުޢާމަލާތެއްގައިވެސް ތެދުވެރިވާށެވެ. މަކަރު ނުހަދާށެވެ. އެއިރުން ﷲ ތަޢާލާގެ ރަޙްމަތް އެމީހަކަށް ލިބިގެންދާނެއެވެ. އިން ޝާ ﷲ
ހަމަ އެއާއިއެކު ބެލުންތައް ތިރިކުރުމަށް އަންހެނުންނަށާއި ފިރިހެނުންނަށް ގަދައަޅައި ނަޞޭޙަތްތެރިވަމެވެ. ކޮންމެހެން ދައްކަންޖެހޭ މިންވަރަށް ނޫނީ ހިލޭ މީހުންނާއި ވާހަކަ ނުދައްކާށެވެ. މިކަންކަމަކީ ހެޔޮގޮތުގައި ޢަމަލުނުކޮށްފިނަމަ ތެދުވެރިކަން ގެއްލިގެން ހިނގައިދާނެ ސަބަބުތައްކަމުގައިވާތީއެވެ.
- މުފްތީ މެންކުގެ ދަރުސަކުން
