4 ފުޅި ހުވަނދުލިބޭ ސުވާލު: ޙައްޖަށްދާން ނިޔަތްގަނެ މަހަކު އެންމެ ރުފިޔާއެއްވެސް ޖަމާކުރެވޭތޯ ބެލުން އަޅުކަމަކަށްވާނެތަ؟
ކޮންމެ އަޅުކަމެއްގައިވެސް ފިރިހަމަކުރަން އޮތީ ދެބައެކެވެ. ފުރަތަމަ ކަމަކީ އެކަމެއްކުރަން އިޚްލާޞްތެރިކަމާއިއެކު ނިޔަތްގަތުމެވެ. ދެވަނަ ކަމަކީ އެކަމެއް ޙާޞިލުކުރަން ކުރަންޖެހޭ މަސައްކަތް އެމީހާގެ ކިބައިގައި ކުޅަދާނަކަން ހުރި މިންވަރަކުންކުރުމެވެ.
ވީމާ މީހަކު ޙައްޖަށްދާން އިޚްލާޞްތެރިކަމާއިއެކު ނިޔަތްގަނެފިނަމަ ފުރަތަމަކުރަންޖެހޭނެ ކަންތައް ފުރިހަމަކުރެވުނީއެވެ. އަދި އެމީހެއްގެ ކިބައިގައި ކެރިފޯރުންތެރިކަން ހުރި މިންވަރަކުން މަހަކު އެންމެ ރުފިޔާއެއްވެސް ރައްކައުކުރާނަމަ ދެވަނަބައި ފުރިހަމަކުރެވުނީއެވެ.
ޙައްޖުވުމަށް ނިޔަތްގަނެ މިމަޤުން މަސައްކަތްކުރާށެވެ! އެފަދަ މީހަކަށްވެހުރިނަމަ ތިބާއަށް ޙައްޖަށް ނުދެވުނު ނަމަވެސް ތިބާއަކީ ޙައްޖުވީމީހެއްފަދައިން ﷲ ތަޢާލާ ތިބާއަށް ރަޙްމަތް ލައްވަވާނެތެވެ! އިން ޝާ ﷲ
_______________________________________________
ރަމަޟާން މަހުން ފެށިގެން މިއަދުނޫހުން ކިޔުންތެރިންނަށްޓަކައި ކޮންމެ ދުވަހަކު ހުށަހަޅަމުން އައި ސުވާލުތަކަށް ކިޔުންތެރިންގެ ޝައުޤުވެރިކަން ބޮޑުވުމުން ޝައްވާލުމަހުގެ 10 ވަނަ ދުވަހާއި ހަމައަށް އިތުރުކޮށް ކޮންމެ ދުވަހަކުވެސް 2 ކިޔުންތެރިއަކަށް، ކޮންމެ ކިޔުންތެރިއަކަށް 4 ފުޅި ހުވަނދު ދިނުމަށްވަނީ 2 ކިޔުންތެރިން ހޮވައިފައެވެ. ޕޭޖްގައި އެކަން އިއުލާނުކުރުމުގެ އިތުރުން އެކިޔުންތެރިއަކަށް ވަކިން މެސެންޖަރުންވެސް ވާނީ އެންގިފައެވެ. އިނާމަށް ހޮވުނު ވަރަށް ގިނަ ބޭފުޅުން ވަނީ އިނާމު ގެންދަވައިފައެވެ. ނުގެންދަވާ ތިއްބެވި ބޭފުޅުންގެ އަރިހުންވެސް އެދެނީ 7788020 އަށް ގުޅުއްވައި ވީހާއަވަހަކަށް އިނާމު ހޯއްދެވުމެވެ.
މިއަދުނޫހުން ހުށަހަޅަމުން މިގެންދަނީ ވަރަށް އާދައިގެ ކުދިކުދި ސުވާލުތަކެކެވެ. ބޭނުމަކީ އެކަންކަން ކިޔުންތެރިންގެ ސަމާލުކަމަށް ގެނައުމެވެ. އިތުރަށް ހޭލުންތެރިކުރުވުމެވެ. އެކަމަށް ކިޔުންތެރިން ދެއްވާ ސަމާލުކަމަށް ބަލައި މި މަސައްކަތް ހުޓާނުލައި ކުރިއަށް ގެންދަން ނިންމައިފީމެވެ. ކޮންމެ ދުވަހަކުވެސް ސުވާލެއް ހުށަހަޅަމުން ގެންދާނަމެވެ.
ނަމަވެސް މިވަގުތު އިނާމު ދިނުމަށް ހޮވާނީ ހަފްތާއަކު 2 ކިޔުންތެރިންނެވެ. އަދަދު އިތުރުކުރަން މިގެންދަނީ މަސައްކަތްކުރަމުންނެވެ.
މިއަދުނޫހަށް ކިޔުންތެރިން ދެއްވާ ސަމާލުކަން ފާހަގަކޮށް ވަރަށް ބޮޑަށް ޝުކުރުވެރިވަމެވެ. އިނާމެއް ހުށަނާޅައި ސުވާލެއް ހުށަހެޅިނަމަވެސް ވަރަށް ގިނަ އަދަދެއްގެ ކިޔުންތެރިން ޖަވާބު ދެއްވާކަން ފާހަކަ ކުރެވެއެވެ. ކިޔުންތެރިން ދެއްވާ ތަރުހީބަށް ފަށްފަށުން ޝުކުރު ދަންނަވަމެވެ.
