4 ފުޅި ހުވަނދުލިބޭ ސުވާލު: ﷲ އަށް ބިރުވެތިނުވާ، ﷲ ގެ އެންގެވުންތަކަށް ލޯބިނުކުރާ މީހަކު އެއްވެސް އިންސާނަކު ދެކެ ޙަޤީޤީ ލޯބިވެދާނެކަމަށް ޤަބޫލުކުރެވޭތަ؟
މިސުވާލު ކިޔުންތެރިންނަށް ހުށަހެޅި އެންމެ ބޮޑު އެއް ބޭނުމަކީ ލޯބިވާކަމަށްބުނެ ކައިވެނީގެ ބޭރުން، ކައިވެނި ނުކޮށްތިބެ، ކައިވެނިކުރުމުން ކުރަން ހުއްދަވާ ކަންކަން ކުރަން އެދޭ މީހުންނަކީ ތިބާދެކެ ޙަޤީޤީ ލޯބިވާ މީހެއް ނޫންކަން ސަމާލުކަމަށް ގެނައުމެވެ.
އެހެނީ އޭނާގެ ހިތަކު ﷲ ތަޢާލާއަށް ބިރުވެތިކަމެއް ނެތެވެ. ﷲ ތަޢާލާގެ އެންގެވުންތަކަށް ވެސް ލޯތްބެއް ނެތެވެ. އެފަދަ މީހަކު ތިބާދެކެ ޙަޤީޤީ ލޯބިވާނީ ކިހިނަކުންހެއްޔެވެ؟ ނުވެވޭނެކަން ޔަޤީން ނޫންހެއްޔެވެ؟
_______________________________________________
ރަމަޟާން މަހުން ފެށިގެން މިއަދުނޫހުން ކިޔުންތެރިންނަށްޓަކައި ކޮންމެ ދުވަހަކު ހުށަހަޅަމުން އައި ސުވާލުތަކަށް ކިޔުންތެރިންގެ ޝައުޤުވެރިކަން ބޮޑުވުމުން ޝައްވާލުމަހުގެ 10 ވަނަ ދުވަހާއި ހަމައަށް އިތުރުކޮށް ކޮންމެ ދުވަހަކުވެސް 2 ކިޔުންތެރިއަކަށް، ކޮންމެ ކިޔުންތެރިއަކަށް 4 ފުޅި ހުވަނދު ދިނުމަށްވަނީ 2 ކިޔުންތެރިން ހޮވައިފައެވެ. ޕޭޖްގައި އެކަން އިއުލާނުކުރުމުގެ އިތުރުން އެކިޔުންތެރިއަކަށް ވަކިން މެސެންޖަރުންވެސް ވާނީ އެންގިފައެވެ. އިނާމަށް ހޮވުނު ވަރަށް ގިނަ ބޭފުޅުން ވަނީ އިނާމު ގެންދަވައިފައެވެ. ނުގެންދަވާ ތިއްބެވި ބޭފުޅުންގެ އަރިހުންވެސް އެދެނީ 7788020 އަށް ގުޅުއްވައި ވީހާއަވަހަކަށް އިނާމު ހޯއްދެވުމެވެ.
މިއަދުނޫހުން ހުށަހަޅަމުން މިގެންދަނީ ވަރަށް އާދައިގެ ކުދިކުދި ސުވާލުތަކެކެވެ. ބޭނުމަކީ އެކަންކަން ކިޔުންތެރިންގެ ސަމާލުކަމަށް ގެނައުމެވެ. އިތުރަށް ހޭލުންތެރިކުރުވުމެވެ. އެކަމަށް ކިޔުންތެރިން ދެއްވާ ސަމާލުކަމަށް ބަލައި މި މަސައްކަތް ހުޓާނުލައި ކުރިއަށް ގެންދަން ނިންމައިފީމެވެ. ކޮންމެ ދުވަހަކުވެސް ސުވާލެއް ހުށަހަޅަމުން ގެންދާނަމެވެ.
ނަމަވެސް މިވަގުތު އިނާމު ދިނުމަށް ހޮވާނީ ހަފްތާއަކު 2 ކިޔުންތެރިންނެވެ. އަދަދު އިތުރުކުރަން މިގެންދަނީ މަސައްކަތްކުރަމުންނެވެ.
މިއަދުނޫހަށް ކިޔުންތެރިން ދެއްވާ ސަމާލުކަން ފާހަގަކޮށް ވަރަށް ބޮޑަށް ޝުކުރުވެރިވަމެވެ. އިނާމެއް ހުށަނާޅައި ސުވާލެއް ހުށަހެޅިނަމަވެސް ވަރަށް ގިނަ އަދަދެއްގެ ކިޔުންތެރިން ޖަވާބު ދެއްވާކަން ފާހަކަ ކުރެވެއެވެ. ކިޔުންތެރިން ދެއްވާ ތަރުހީބަށް ފަށްފަށުން ޝުކުރު ދަންނަވަމެވެ.
