އަޅުކަމުގެ ތެރެއިން ﷲ ތަޢާލާގެ ހަޟްރަތުގައި އެންމެ މުހިންމުވެގެންވަނީ ނުވަތަ ލޮބުވެތިކަން ބޮޑުވަނީ ދާއިމީ ގޮތެއްގައި ކުރެވޭ އަޅުކަމެވެ. ވީމާ ކުރާ އަޅުކަން އެއް މިންވަރެއްގައި ހިފަހައްޓަން ގަދައަޅައި މަސައްކަތްކުރާށެވެ!
މީގެ މާނައަކީ އަޅުކަން ކުރުން އިތުރު ނުކުރުމެއް ނޫނެވެ. އިތުރުކުރަންވީއެވެ. ނަމަވެސް ސަމާލުކަން ދޭންވީ ޢާންމުކޮށް ކުރާ މިންވަރަށް ކޮންމެ ދުވަހަކުވެސް ކުރުމަށެވެ. އަމިއްލަ ސަބަބުތައް ކުރިއަށް ނެރެ ކުރާ އަޅުކަން މަދުނުކުރުމަށެވެ.
ހުކުރު ދުވަހަކަށް ބަލައި މިސާލަކަށް ބުނާނަމަ ކަހްފި ސޫރަތް ކިޔެވުމެވެ. ރަސޫލް (ﷺ)އަށް ޞަލަވާތް ކިޔެވުން ގިނަކުރުމެވެ. ޞަލަވާތް ކިޔެވުން ގިނަކުރުން ކަމަށް ބައެއް ޢިލްމުވެރިން ވިދާޅުވެފައިވަނީ ކިތަންމެ ކުރު ޞަލަވާތެއް ނަމަވެސް 1000 ފަހަރު ކިޔެވުމެވެ.
ނަމަވެސް އެމީހަކަށް ކިޔެވުނު މިންވަރަކަށް ކިޔެވުމުންވެސް ފުދޭނެއެވެ. ހޯދަން މިއުޅެނީ ޘަވާބެވެ! ﷲ ތަޢާލާގެ ރުހިވޮޑިގަތުމެވެ. ވީމާ އެކަމަށް އެމީހަކު މަސައްކަތްކުރާނެ މިންވަރު އެނގޭނީ އެމީހަކަށެވެ. އެކަން ކަނޑައެޅުމުގެ އިޚްތިޔާރު ކޮނމެ މީހަކަށްވެސް ވަނީ ދެއްވަވައިފައެވެ.
އަނބިދަރިންނަށާއި ޢާއިލާއަށް އެހީތެރިވުމަކީވެސް ހަމަ އަޅުކަމެވެ. ބައެއް ހުކުރު ދުވަހު މޫޑް ހުންނަ ގޮތުން ކަމަށް ހަދައި އެކަންކަން ދޫކޮށްނުލާށެވެ! އެއް މިންވަރެއްގައި ކުރަން އާދަކުރާށެވެ!
މީގެ ތެރޭގައި ހުކުރަށް ދާ ވަގުތުވެސް ހިމަނާށެވެ! އެންމެ ފައިދާ ބޮޑީ ވީހައި ކުރިން ހުކުރަށް ދިއުމެވެ! ވީމާ އެކަންވެސް އެއް އުޞޫލަކުން ކުރަން ގަދައަޅައި މަސައްކަތްކުރާށެވެ!
--އިސްލާމީ ތިލަފަތުގެ ދަރުސަކުން
