ރަސޫލާ ﷺ ޙަދީޘް ކުރެއްވި: "ކޮންމެ މަހަކު ތިންދުވަހު ރޯދަ ހިފުމަކީ މުޅި އަހަރު ދުވަހު ރޯދަހިފުން ފަދަ ކަމެކެވެ." (އަލްބުޚާރީ އަދި މުސްލިމް.)
ހަނދުމަހުގެ 13،14،15 މި 3 ދުވަހު ރޯދަހިފަން މަސައްކަތްކުރަމާ ހިނގާށެވެ. މިމަހުގެ މި 3 ދުވަހު ރޯދަހިފިމާއިބެހޭ ގޮތުން ޑރ. އިޔާޟް ވިދާޅުވެފައިވެއެވެ.
"މިމަހުގެ 1 އިން ފެށިގެން 9 އަކަށް ރޯދަ ހިފިމީހުންނަށް ވާނީ މަހުގެ 3 ދުވަހު ރޯދަ ހިފުމުގެ ސުންނަތް ޙާޞިލުކުރެވިފައެވެ. އެހެނީ 13،14،15 ދުވަހުގެ ރޯދައަކީ މަހުގެ ކޮންމެ 3 ދުވަހަކު ހިފިދާނެ 3 ރޯދައެވެ. ދެން ޢަރަފާތު ދުވަހު އެކަނި ރޯދަ ހިފިމީހުން މާދަމާއިން ފެށިގެން ކުރިއަށް އޮތް 14،15 ދެ ދުވަހު ރޯދަ ހިފިނަމަވެސް ސުންނަތް ޙާޞިލްކުރެވޭނެއެވެ. އެހެންކަމާއިއެކުވެސް 3 ދުވަހު ރޯދަހިފަން ބޭނުންވާ މީހުން ކުރިއަށް އޮތް، 14،15،16 ތިން ދުވަހު ރޯދަހިފުމަކީވެސް ހަމަކުރެވިދާނެކަމެކެވެ.
އޮތީ ވީހާ ގިނައިން ސުންނަތް ރޯދަތައް ހިފުމެވެ. ހިފާ ކޮންމެ ރޯދައަކަށް އެމީހާ 70 އަހަރުގެ ރާސްތާއަށް ނަރަކައާ ދުރުކުރައްވަވާނެކަން ޙަދީޘްފުޅުން އެނގެން އެބައޮތެވެ."
