މީހަކު ނުބައިކަމެއް ކުރީއެވެ. ބަދަލުގައި ތިބާވެސް ނުބައިކަމެއް ކުރީއެވެ. އެއިރުން ދެމީހުން ދެ ނުބައިކަންކޮށް އެއްވަރުވީ ނޫން ހެއްޔެވެ؟ ތިބާއަށް ކުރި ފައިދާއަކީ ކޮބައިހެއްޔެވެ؟ އަދި މިގޮތަށްވެސް ވިސްނާށެވެ! ބަދަލު ހިފުމަކީވެސް ކުރެވޭ ނުބައިކަމެކެވެ. ބަދަލު ހިފަން ކުރެވޭ ކަންތައްވެސް ވާނީ ނުބައި ކަމަކަށެވެ! އެއިރުން އޭނާ ކުރި ނުބައި ކަންތަކުގެ ބަދަލުގައި ތިބާއަށް އެކުރެވެނީ ނުބައި ދެ ކަންތަކެވެ! ތިބާ މާ ގޯސްވެސް ވީނޫންހެއްޔެވެ؟
މީހަކު ތިބާއަށް ދެރައެއް ދިން ނަމަވެސް ބަދަލު ނުހިފާށެވެ! އެއިރުން އެ ކުރެވޭ ކަމަކީ ދެ ނުބައިކަން އެއްކުރުމެވެ. ނުބައި ކިތަންމެ ކަމެއް ކުރިނަމަވެސް ރަނގަޅު އެންމެ ކަމަކަށްވެސް ބަދަލެއް ނުވާނެއެވެ. ނުބައިކަންކަން ވާނީ ނުބައި ކަމަކަށެވެ!
މީހަކު ތިބާއަށް ނުބައިކަމެއް ކޮށްފިނަމަ އެކަން ވާނީ ތިބާ ކުރި އެއްވެސް މަސައްކަތަކާއި ނުލައި ތިބާއަށް ލިބޭ ފައިދާއަކަށެވެ! އާޚިރަތަށް ގެންދަން ލިބޭ ބޮޑު މުދާގަނޑަކަށެވެ! އަދި ކީއްހެއްޔެވެ؟ އޭނާއަށް މާފުކޮށްފިނަމަ އެ ހޯދުނީ މާ ގިނަ ފައިދާއެވެ!
ވީމާ މީހަކު ތިބާއަށް ކިތަންމެ ބޮޑު ނުބައި ކަމެއް ކުރިނަމަވެސް ބަދަލު ނުހިފައި އެހިސާބުން އެކަން ހަނދާންވެސް ނައްތައިލާށެވެ! އެ މައްސަލަ އަމިއްލައަށް ނިންމަން މަސައްކަތް ނުކުރާށެވެ! ﷲ ތައާލާއަށް ވަކީލުކޮށް ދޫކޮށްލާށެވެ! ﷲ ތަޢާލާ އެކަން ނިންމަވާނީ ތިބާއަށް އެންމެ ފައިދާކުރާނެ ގޮތަށެވެ!
- އިސްލާމީ ތިލަފަތުގެ ދަރުސަކުން
