އޭނާގެ ފިރިމީހާއަކީ އެއްގޮތަކަށްވެސް އޭނާކުރާ މަސައްކަތުގެ އަގުވަޒަންކުރާ މީހެއް ނޫނެވެ. ދެދަރިން ބަލަމުން ބަލިޙާލުގައި އެނދުގައި އޮންނަ މަންމަގެ ކަންކަން ބަލަހައްޓަމުން ގޭތެރޭގެ މަސައްކަތްކުރަމުން އޭނާގެ ފިރިމީހާއަށް ކޮށްދޭ ޚިދުމަތުގެ އަގުވަޒަނެއް ނުކުރެއެވެ.
އަނބިމީހާއަށް ނުބައި ބަސްތައް ބުނުމަކީ ފިރިމީހާގެ ވަރަށް ޢާންމުކަމެކެވެ. އެކަންކަމަށް ކެތްނުކުރެވިގެން އޭނާކުރާ ކަންކަމުގެ އަގުވަޒަންކޮށްދިނުމަށާއި ނުބައި ބަސްތައް ނުބުނަން ތަކުރާރުކޮށްކުރަމުން ގެންދިއަ އާދޭސްތަކުގެ ނަތީޖާއަކަށްވީ އަނބިމީހާގެ މީނުމަތީގައި ޖަހާ ދުޅަކޮށްލުމެވެ.
އެދުވަހު އަނބިމީހާ ފިރިމީހާގެ ދައްތަ އާއި ބައްދަލުކުރިއެވެ. ފިރިމީހާގެ އަމަލުތައް ހުރިގޮތް ކިޔައިދީ އޭނާއަށް ވިސްދިނުމަށް އެދުނެވެ. އެކަން ކޮށްދޭނެ ކަމަށް ދައްތަ ވައުދުވިއެވެ.
އަނެއް ދުވަހު ދައްތަ، ކޮއްކޮއަށް ފޮނުވީ އޭނާގެ ފިރިމީހާ އޭނާގެ ގައިގައި ތަލާ އަނިޔާކުރާ ވީޑިއޯއެކެވެ. ވީޑިއޯ ލިބުމާއިއެކު ރުޅި އައިސް ރަތްވެގެންހުރެ ކޮއްކޮ އެގެއަށް ދިއައެވެ. ދައްތަގެ ފިރިމީހާ ހޯދައި ބަދަލުހިފަން ބޭނުންވިއެވެ.
އެވަގުތު އެތަނަށް ފިރިމީހާ ދިއުމުން ތަޅައިގަންނަން އަތްއިސްކުރުމުން ދައްތަ އެކަން ހުއްޓުވިއެވެ. ބުންޏެވެ. "ކޮއްކޯއެވެ. ތަދުވާނީ ޅިޔަނު ދައްތަގެ ގައިގާ ތެޅުމުން އެކަންޏެއް ނޫނެވެ. ކޮއްކޮ، ކޮއްކޮގެ އަނބިމިހާގެ ގައިގައި ތެޅީމައި އޭނާއަށްވެސް ތަދުވާނެއެވެ.
ދައތަމެން ދެމަފިރިންގެ މެދުގައިވެސް މައްސަލަތައް ޖެހެއެވެ. ޙައްލުކުރަނީ މަޝްވަރާކޮށްގެންނެވެ. ކޮއްކޮވެސް އެގޮތް އިޚްތިޔާރުކުރާށެވެ. ދުވަހަކުވެސް ދައްތަގެ ފިރިމީހާ ރުޅިއައިސްގެން ދައްތަ ގައިގާ އަތްވެސް ޖައްސާނުލައެވެ. ތިއައީ ކޮއްކޮއަށް ފިލާވަޅެއް ދެވޭތޯ ކުލެފައި އޮތް ޑްރާމާއެކެވެ."
އޭނާ ވަރަށް ދެރަވިއެވެ. ދެން ދުވަހަކުވެސް އަނބިމީހާގެ ގައިގައި ނުޖަހާނެކަމަށާއި ކަންކަން އިޞްލާޙްކޮށް ލޯބިން އުޅުމަށް ވަޢުދުވިއެވެ. ގެއަށް ގޮސް ވަނުމުން އަނބިމީހާ ހީކުރީ އެވާހަކަ ދައްތަ ގާތު ބުނުމުން ތަޅައިގަންނަން އުޅެނީކަމަށެވެ. އެހެންވެ ބިރުން އަޑުގަދަވެސް ކުރެވުނެވެ.
އެވަގުތު ފިރިމީހާ އަނބިމީހާގެ ގައިގައި ލޯބިން ބައްދައިލިއެވެ. ކުރެވުނު ކަންކަމަށް މާފަށްވެސް އެދުނެވެ. އެފަދަ ކަންކަން ދެން ނުކުރާނެ ކަމަށް ވަޢުދުވިއެވެ. ލޯބީގެ އައު ފެށުމެއްގެ ގޮތުން ރީތި މަލެއްވެސް ދިއްކޮށްލިއެވެ.
މިއީ އަޅުގަނޑު ބެލި ފިލްމެއްގެ ކުރު ޚުލާޞާއެކެވެ. މިފިލްމު ގިނަބައަކު ބަލާފައިވާނެކަންވެސް އެނގެއެވެ. އެހެންކަމާއިއެކުގައިވެސް މިވާހަކަ މިއަދުނޫހުގެ ކިޔުންތެރިންނަށް މިގެނެސްދިނީ ވަރަށް ބޮޑު ބޭނުމަކުއެވެ.
ބުނެލަން ބޭނުންވަނީ ދެމަފިރިންގެ މެދުގައި ޖެހޭ މައްސަލަތައް ޙައްލުކުރަން ޢާއިލާއިން މިފަދަ ޙިކުމަތްތެރި އުކުޅުތައް ބޭނުންކުރާނަމަ ހާދަގިނަ މައްސަލަތަކެއް ޙައްލުކުރެވޭނެއެވެ. ކޮންމެ ދެމަފިރިއެއްގެ މެދުގައިވެސް މައްސަލަތައް ޖެހޭނެއެވެ. ޙައްލުކުރަން ޢާއިލާގެ އެހީތެރިކަމަށް އެދުމުން އެހީތެރިވެދޭނަމަ ކަންކަން ގޯހުން ގޯހަށް ދިއުމުގެ ބަދަލުގައި އިޞްލާޙްވެ ހަމަޖެހުމާއި އުފާވެރިކަން ލިބޭނެއެވެ.
ހަމައެއާއިއެކު ދެމަފިރިންވެސް އަނެކަކު ކުރާ ކަންކަމުގެ އަގު ވަޒަންކުރުމުގެ މުހިންމުކަންވެސް ފާހަގަކޮށްލާނަމެވެ. އެކަން ނުކުރެވޭނަމަ އުފަލުގައި ދިރިއުޅެން ވަރަށް ގިނަ ހުރަސްތައް ހުންނާނެއެވެ.
- އިޙްޞާނާ / މިއަދުނޫހުގެ ކިޔުންތެރިއެއް
