• އަހަރެން ބުނީމެވެ.
"ހައްދަވާ ބޮޑުކުރެއްވި ރަސްކަލާކޯއެވެ. މިއަޅާ މިވަނީ ނުހަނު ބޮޑު މުސީބާތެއްގައެވެ."
- އެކަލާނގެ ވަޙީ ކުރައްވާފައިވެއެވެ.
"...ތިޔަބައިމީހުން ﷲ ގެ ރަޙްމަތުން އުންމީދު ކަނޑާނުލާށެވެ. ހަމަކަށަވަރުން ﷲ އީ، އެންމެހާ ފާފަތައް ފުއްސަވާ ރަސްކަލާނގެއެވެ..." (ޤުރްއާން 39:53)
• އަހަރެން ބުނީމެވެ.
"ޔާ ﷲ. މިއަޅާ މިވަނީ މާޔޫސްވެފައެވެ.
- އެކަލާނގެ ވަޙީ ކުރައްވާފައި ވެއެވެ.
"އެއުރެންނީ އީމާންވި މީހުންނެވެ. އަދި ﷲ ހަނދުމަ ކުރުމުން، އެއުރެންގެ ހިތްތައް ހަމަޖެހޭ މީހުންނެވެ. ހިތްތައް ހަމަޖެހެނީ، ﷲ ހަނދުމަ ކުރުމުން ނޫން ހެއްޔެވެ؟" (ޤުރްއާން 13:28)
• އަހަރެން ބުނީމެވެ.
"ޔާ ﷲ. ވަރަށް ގިނަ މީހުން މިއަޅާއަށް ދެރަ ދީފިއެވެ."
- އެކަލާނގެ ވަޙީ ކުރައްވާފައިވެއެވެ.
"...ތިޔަބައިމީހުން ޢަފޫކޮށް، މާފުކޮށް، އަދި ކުށަކަށް ނުހަދައިފިނަމަ (ދަންނާށެވެ!) ފަހެ، ހަމަކަށަވަރުން، ﷲ އީ، ގިނަގިނައިން ފާފަ ފުއްސަވާ، ރަޙީމްވަންތަ ރަސްކަލާނގެއެވެ." (ޤުރްއާން 64:14)
• އަހަރެން ބުނީމެވެ.
"ހައްދަވާ ބޮޑު ކުރެއްވި ރަސްކަލާކޯ. މިއަޅާއަކީ އެކަނިވެރިއެއް ކަމުގައި މިއަޅާއަށް އިޙުސާސް ވެއެވެ."
- އެކަލާނގެ ވަޙީ ކުރައްވާފައިވެއެވެ.
"..އަދި އޭނާގެ ނަފްސު އޭނާއަށް ވަސްވާސްދޭ ކަންތައް ތިމަންރަސްކަލާނގެ ދެނެވޮޑިގެންވަމެވެ. އަދި އޭނާގެ ކަނދުރާގެ މައިނާރަށްވުރެވެސް ތިމަންރަސްކަލާނގެ އޭނާޔާ ކުއްތަންވެ ވޮޑިގަތުން ބޮޑެވެ." (ޤުރްއާން 50:16)
• އަހަރެން ބުނީމެވެ.
"ޔާ ﷲ. މިއަޅާގެ ފާފަތައް ނުހަނު ގިނަގުނައެވެ."
- އެކަލާނގެ ވަޙީ ކުރައްވާފައިވެއެވެ.
"... ﷲ ފިޔަވައި ފާފަފުއްސަވާނީ ފަހެ، ކާކު ހެއްޔެވެ؟..." (ޤުރްއާން 3:135)
• އަހަރެން ބުނީމެވެ.
"ޔާ ﷲ. މިއަޅާ ދޫކޮށް ނުލައްވާފާނދޭވެ!"
- އެކަލާނގެ ވަޙީ ކުރައްވާފައިވެއެވެ.
"ފަހެ، ތިޔަބައިމީހުން ތިމަންރަސްކަލާނގެ ހަނދުމަ ކުރާށެވެ. އޭރުން ތިމަންރަސްކަލާނގެ ތިޔަބައިމީހުން ހަނދުމަ ކުރައްވާ ހުށީމެވެ..." (ޤުރްއާން 2:152)
• އަހަރެން ބުނީމެވެ.
"ޔާ ﷲ. ދިރިއުޅުމުގައި މިއަޅާއަށް ވަރަށް ގިނަ ދަތި އުނދަގޫތަކާއި އެބަ ކުރިމަތިވެއެވެ."
- އެކަލާނގެ ވަޙީ ކުރައްވާފައިވެއެވެ.
"... އަދި ﷲ އަށް ތަޤްވާވެރިވާ މީހާ ދަންނާށެވެ. އެކަލާނގެ އޭނާއަށް ނުކުންނާނެ މަގެއް ދައްކަވާނެތެވެ." (ޤުރްއާން 65:2)
• އަހަރެން ބުނީމެވެ.
"ހައްދަވާ ބޮޑުކުރެެއްވި ރަސްކަލާކޯ. މިއަޅާ ފުރިހަމަ ކުރަން ބޭނުންވާ ވަރަށް ގިނަ ހުވަފެންތަކެއް ވެއެވެ."
- އެކަލާނގެ ވަޙީ ކުރައްވާފައިވެއެވެ.
"... ތިޔަބައިމީހުން ތިމަންރަސްކަލާނގެއަށް ދުޢާ ކުރާށެވެ! ތިމަން ރަސްކަލާނގެ ތިޔަބައިމީހުންގެ ދުޢާ އިޖާބަ ކުރައްވާ ހުށީމެވެ..." (ޤުރްއާން 40:60)
ކީރިތި ޤުރްއާނުގައި މާތް ﷲ ވަޙީ ކުރައްވާފައިވެއެވެ.
"ތިމަންރަސްކަލާނގެ ޤުރްއާނުން މުޢުމިނުންނަށް ރަޙްމަތާއި ޝިފާ ކަމުގައިވާ ތަކެތި ބާވައިލައްވަމެވެ..." (ޤުރްއާން 17:82)
