ކޮންމެ މީހަކީވެސް އެމީހަކު ކުރަން ޖެހޭ ގިނަ ކަންތައްތަކެއް ހުންނާނެ މީހެކެވެ. އަދި ކޮންމެ ދުވަހަކީވެސް ކަންތައްތަކެއް ކުރަން ޖެހޭނެ ދުވަހެކެވެ. ދިރިއުޅުން މިކިޔަނީ އެހުރިހައި ކަމެއް އެއްކޮށްގެންނެވެ. ވީމާ ތިމާ ކުރަން ބޭނުންވާ ކަންކަން ފުރިހަމަވެ ނިމޭނެ ދުވަހެއް އަންނާނެ ކަމަށް އުންމީދުވެސް ނުކުރާށެވެ.
މިކަމުގެ އެންމެ ބޮޑު ދަލީލަކީ މީހުންގެ ބޭނުންތައް ފުއްދަވައި ދެއްވެވުމުގައި ރަސޫލް (ޞޢވ) ޢަމަލުފުޅު ކުރެއްވެވި ގޮތެވެ. މީހަކު ކަމަކު އެދިގެން އައުމުން އެމީހާގެ ބޭނުން އަމިއްލަފުޅަށް ފުއްދަވައި ދެއްވެވެން ނެތް ޙާލުކޮޅުގައި ތެދުވެވަޑައިގެން އެމީހާގެ ބޭނުން ފުއްދަވައި ދެއްވެވޭނީ ކޮން ޞަހާބީއަކަށްތޯ ސުވާލުކުރައްވަވައިގެން ވެސް އެހެން މީހުންގެ ބޭނުންތައް ފުއްދަވައި ދެއްވަވަން މަސައްކަތްޕުޅު ކުރެއްވެވި ކަމެވެ.
ވީމާ އެގޮތަށް ޢަމަލުކުރުން އަހަރެމެންނަށް މިވަނީ ސުންނަތް ކަމަކަށްވެފައެވެ. ރަސޫލް (ﷺ)ގެ ސުންނަތަށް ޢަމަލުކުރުމަކީ އެކަމުގެ ފައިދާ އެމީހަކަށް ދެދުނިޔޭގައިވެސް ފެނިގެންދާނެ ކަމެކެވެ. އިން ޝާ ﷲ
ކޮންމެވެސް ސަބަބެއް މެދުވެރިވެގެން ކޮންމެހެން ކުރަންޖެހޭ ކަންކަން ނުކުރެވިފައި ތިބި އެތައް ބައިވަރު ބައަކު އަބަދުވެސް ތިބޭނެއެވެ. އެފަދަ މީހަކަށް އެހީތެރިވެދޭށެވެ! އޭނާގެ ތަކްލީފްތައް ފަސޭހަކޮށްދޭން އެހީތެރިވާށެވެ! އެއިރުން ތިބާއަށް އުފުލަން ޖެހޭ ތަކްލީފްތައް އުފުލަން ﷲ ތަޢާލާ އެހީތެރިވެވޮޑިގެން ދެއްވަވާނެތެވެ. އިން ޝާ ﷲ
ވީމާ އެހެން މީހުންނަށް އެހީތެރިވުމަކީ ތިމާ ކުރަން ޖެހޭ ހުރިހާ ކަންކަން ކުރެވި ނުމުމުން ކުރަން އޮތް ކަމެއް ކަމަށް ނުދެކޭށެވެ! އެހެނީ އެހެން މީހުންނަށް އެހީތެރިވުމަކީ ތިބާ ކުރަން ހުރިކަންކަން ނުވަތަ ކުރަން ބޭނުންވާ ކަންކަން ފުރިހަމަކުރެވުމަށް ބާރަކަށް ވެގެންދާނެކަން ޔަޤީނެވެ.
--އިސްލާމީ ތިލަފަތުގެ ދަރުސަކުން
