ސުވާލު:
މީހަކު މަރުވާއިރު އެމީހާގެ އެކައުންޓުގައި ސޭވްކޮށްފަ ހުންނަ ފައިސާއިން ޒަކާތް ނެރެންޖެހޭނެތޯ؟
ޑރ. މުޙައްމަދު ޝަހީމް ޢަލީ ސަޢީދުގެ ޖަވާބު:
މީހަކު މަރުވާއިރު އޭނާގެ އެކައުންޓުގައި ޒަކާތުގެ ނިޞާބަށްވުރެ އިތުރަށް ފައިސާހުރެފައި މަރުވުމުގެ ކުރިން ޒަކާތް ނުދެއްކި އޮވެއްޖެ ނަމަ ޢަމަލު ކުރަންޖެހޭނެ ގޮތަކީ، ވާރިސުންގެ މެދުގައި އެފައިސާ ބެހުމުގެ ކުރިން އެއިން މުދަލު ޒަކާތަށް ވާޖިބުވެގެންވާ ބައި ނެރުމެވެ.
ސަބަބަކީ އެއީ ﷲ ގެޙައްޤަކަށްވުމެވެ. އެއީ ﷲ އަށްޓަކައި އަދާކުރަންޖެހޭ ދަރަންޏެކެވެ. މިގޮތަށް ޒަކާތަށްވީ ބައި ނެރުމަށް ފަހު، ބާކީ ހުންނަ ފައިސާ ވާރިސުންގެ މެދުގައި، ޝަރުޢީ ހަމަތަކުގެ މަތިން ބަހާނީއެވެ.
