މީސްތަކުންނޭވެ! ހިތާމަކޮށްލަން ޖެހޭ ވަޤުތުތަކާއި ކަންބޮޑުވާންޖެހޭ ވަޤުތުތަކާއި ބައްދަލުވާނެއެވެ. އެހެން ނޫންނަމަ ރަސޫލް ޞައްލަﷲ ޢަލައިހި ވަސައްލަމްގެ އަރިއަހުގައި އިންނަވައިގެން އަބޫބަކުރުގެފާނު ކަންބޮޑުވެވަޑައެއް ނުގަތީހެވެ. ހިތާމައެއް ނުކުރެއްވެވީހެވެ.
އެވަޤުތު ރަސޫލް ޞައްލަﷲ ޢަލައިހި ވަސައްލަމް ބަޔާންކޮށްދެއްވެވި ﷲ ތަޢާލާގެ ވަޙީބަސްފުޅު ހަނދުމަކުރާށެވެ! "...ހިތާމަ ނުކުރައްވާށެވެ! ﷲ ތަޢާލާ ވަނީ އަހުރެމެންނާއިއެކުގައެވެ..."
އެފަދަ ޙާލަތުގައި ﷲ ތަޢާލާ އާއި އިތުރަށް ކުއްތަންވެލާށެވެ! އެއިރުން ﷲ ތަޢާލާ ތިބާއާއިއެކުގައި ވޮޑިގަންނަވާނެތެވެ. އެއިރުން ތިބާއަށް ދެރައެއް، ހިތްދަތިކަމެއް ދެވޭނެ ހަމައެކަކުވެސް ނުހުންނާނެއެވެ.
ރަނގަޅަށް އަޑުއަހާށެވެ! ތިބާއާއިއެކުގައި ﷲ ތަޢާލާ ވޮޑިގެންވާކަން ޤަބޫލުކުރެވޭ މީހާ ކަންބޮޑުވާންވީ ކީއްވެގެން ހެއްޔެވެ؟ އެއްވެސް މީހަކަށް އެއްވެސް ކަމެއް ކުރެވޭނީ ﷲ ތަޢާލާގެ އިޛްނަފުޅާއިއެކުގައިކަން އެއީ ޔަޤީންވާކަމެއް ނޫންހެއްޔެވެ؟
ވީމާ އެއްވެސް މީހަކަށް ތިބާއަށް އެއްވެސް ދެރައެއް ދެވޭނީ އެކަމަކަށް ﷲ ތަޢާލާ އިރާދަކުރައްވަވައިފިނަމަ އެވެ. ﷲ ތަޢާލާ އިރާދަކުރައްވަވައިފިކަމެއް ހުއްޓުވޭނެ މީހަކުވެސް ނުވެއެވެ. އަދި ﷲ ތަޢާލާ ކޮންމެ ކަމެއްވެސް މުއްމިނުންނަށް އިރާދަ ކުރައްވަވާނީ އެމީހަކަށް ރަނގަޅަކަށެވެ. ވަކީލްކުރާ ކޮންމެ މީހަކަށްވެސް އެކަން ޔަޤީންކުރެވޭނެއެވެ.
މިބަޔާންކުރި ކަންކަން ޤަބޫލުކުރީމާ ކަންބޮޑުވުމާއި ހިތާމައިގައި ތިބި އެންމެންނަށް އެކަންކަމުން ސަލާމަތްކަން ލިބޭނެއެވެ! އިން ޝާ ﷲ
- މުފްތީ މެންކްގެ ދަރުސަކުން
