ދެކުނު އޭޝިއާގެ އެންމެ ބާރުގަދަ ޕާސްޕޯޓަކަށް ދިވެހިރާއްޖޭގެ ޕާސްޕޯޓް ވެއްޖެއެވެ. މިކަން ހާމަވެފައިވަނީ އިނގިރޭސިވިލާތުގެ ހެންލީ އެންޑް ޕާޓްނަރސްއިން އެކުލަވާލައި ނެރެފައިވާ "ހެންލީ ޕާސްޕޯޓް އިންޑެކްސް" ގެ އެންމެ ފަހުގެ ލިސްޓުންނެވެ.
މި ލިސްޓުގައި ދުނިޔޭގެ 227 ޤައުމެއްގެ ޕާސްޕޯޓުތައް ހިމެނިފައިވާއިރު، ދިވެހިރާއްޖެ ވަނީ 52 ވަނަ ދަރަޖައިގައި ހިމެނިފައެވެ. މިއީ މިދިޔަ އަހަރާ އަޅާބަލާއިރު 6 ދަރަޖައިގެ ކުރިއެރުމެކެވެ. މިދިޔަ އަހަރު ދިވެހިރާއްޖެ އޮތީ 58 ވަނަ ދަރަޖައިގައެވެ.
މި ލިސްޓުގައި ޤައުމުތައް ތަރުތީބުކޮށްފައިވަނީ އެ ޤައުމެއްގެ ޕާސްޕޯޓު ބޭނުންކޮށްގެން ވީޒާއަކާ ނުލައި ދަތުރުކުރެވޭ ޤައުމުތަކުގެ އަދަދަށް ބަލައިގެންނެވެ. މިގޮތުން، ދިވެހި ޕާސްޕޯޓު ބޭނުންކޮށްގެން މިހާރު ވީޒާއަކާ ނުލައި 94 ޤައުމަކަށް ދަތުރުކުރެވެއެވެ.
"ހެންލީ ޕާސްޕޯޓް އިންޑެކްސް" އަކީ ކޮންމެ އަހަރަކު އެއްފަހަރު ނެރޭ ލިސްޓެކެވެ. މިއަހަރު ދުނިޔޭގެ އެންމެ ބާރުގަދަ ޕާސްޕޯޓުގެ ގޮތުގައި އޮތީ ސިންގަޕޫރުގެ ޕާސްޕޯޓެވެ.
މި ލިސްޓުގައި ދިވެހިރާއްޖޭގެ ޕާސްޕޯޓުގެ ދަރަޖަ މަތިވެފައިވުމަކީ ދިވެހިރާއްޖޭގެ ބައިނަލްއަޤްވާމީ ގުޅުންތައް ވަރުގަދަވެ، ދިވެހި ރައްޔިތުންނަށް ބޭރު ދުނިޔެއަށް ދަތުރުކުރުމުގެ ފުރުސަތުތައް އިތުރުވެފައިވާކަމުގެ ހެއްކެކެވެ.
