ކުޑަކުދިންނަށް ދޭ ބޭހެއް ކަމަށްވާ އަލެގްރާ ވިއްކުމާއި ބޭނުންކުރުން މޯލްޑިވްސް ފުޑް އެންޑް ޑްރަގް އޮތޯރިޓީން، (އެމް.އެފް.ޑީ.އޭ) އިން މަނާކޮށްފިއެވެ.
ރޯގާ ޖެހުމުންނާއި އެލާޖިކްވުމުން އާންމުކޮށް ބޭނުންކޮށް އުޅޭ އަލެގްރާގެ 3 ބެޗެއްގައި ކޮލެޓީގެ މައްސަލަތަކެއް އުޅޭތީ، އެ ބެޗުތައް ރާއްޖޭގައި ވިއްކުމާއި ބޭނުންކުރުން މަނާކޮށްފައިވަނީ އިންޑިއާއިން އުފައްދާ އަލެގްރާ ބޭހުގެ AL1223019، AL1223060، އަދި AL1223029 ބެޗްތަކުގައި ހިމެނޭ ބޭހެވެ.
މިކަމާގުޅިގެން އެމް.އެފް.ޑީ.އޭ އިން ބުނެފައިވަނީ ރާއްޖެ އެތެރެކޮށް ބޭނުންކުރާ މި ބޭހުގެ 3 ބެޗަކުން ކޮލިޓީ މައްސަލަތަކެއް ދިމާވެފައިވާކަމަށް ބޭސް އުފައްދާފައިވާ ކުންފުނިން އެލަރޓްކޮށްފައިވާކަމަށެވެ. އެހެންކަމުން އެ 3 ބެޗް ރާއްޖެ އެތެރެކުރުމާއި ވިއްކުން އަދި ބޭނުން ކުރުމަކީ މަނާކަމެއްކަމަށް އެމް.އެފް.ޑީ.އޭއިން ވިދާޅުވެއެވެ.
ފާމަސީ، ބޭސް ގުދަނެއް ނުވަތަ ސިއްޙީ ޚިދުމަތްދޭ ތަނެއްގައި މި ބޭހުގެ ބެޗްތައް ހުރިނަމަ އެމް.އެފް.ޑީ.އޭ އަށް އެންގުމަށްވެސް ވަނީ އެދިފައެވެ.
