މާލެ ސިޓީ ކައުންސިލަށް އަލަށް އިންތިޚާބުވި 3 ކައުންސިލަރުން މިއަދު މަޤާމުގެ ހުވާކޮށްފިއެވެ. ހުވާކުރުމުގެ ރަސްމިއްޔާތު ބޭއްވުނީ މީރުމާގައި ބޭއްވުނު ޚާއްސަ ރަސްމިއްޔާތެއްގައެވެ.
މާލެ ސިޓީ ކައުންސިލުގެ 3 ދާއިރާއެއްގެ ގޮނޑި ހުސްވެގެން ބައި-އިލެކްޝަން ބޭއްވުނީ އެ ދާއިރާތައް ތަމްސީލްކުރައްވަމުން ގެންދެވި ކައުންސިލަރުން ރައްޔިތުންގެ މަޖިލީހަށް އިންތިޚާބުވެވަޑައިގަތުމާ ގުޅިގެންނެވެ. މި ބައި-އިލެކްޝަން ކާމިޔާބުކޮށް، މިއަދުގެ ރަސްމިއްޔާތުގައި މާލެ ސިޓީ ކައުންސިލަރުންގެ ގޮތުގައި ހުވާކުރެއްވީ:
- ހެންވޭރު ހުޅަނގު ދާއިރާއިން ފާތިމަތު ޝައުފާ ސަލީމް
- މައްޗަންގޮޅި މެދު ދާއިރާއިން ފާޠިމަތު އިޝާން ޢަލީ
- ހުޅުމާލެ ދާއިރާއިން ޢަލީ އައިމަން
މި ބޭފުޅުންނަށް ހުވާލައިދެއްވީ ޑްރަގް ކޯޓުގެ ގާޒީ އަހުމަދު ސަމީރެވެ.
އަލަށް ހޮވުނު 3 ކައުންސިލަރުންވެސް ނިސްބަތްވަނީ ޕީޕަލްސް ނެޝަނަލް ކޮންގްރެސް (ޕީއެންސީ) އަށެވެ.
މި ބައި-އިލެކްޝަނާއެކު މާލެ ސިޓީ ކައުންސިލުގެ ހުރިހާ ގޮނޑިއެއް ފުރިހަމަވެ، ކައުންސިލުގެ މަސައްކަތްތައް އިތުރަށް ހަރުދަނާވެގެންދާނެ ކަމަށް އުއްމީދު ކުރެވެއެވެ.
މާލެ ސިޓީ ކައުންސިލަށް އަލަށް އިންތިޚާބުވި ކައުންސިލަރުން ހުވާކޮށްފި
