ޕީޕަލްސް ނޭޝަނަލް ކޮންގްރެސް (ޕީއެންސީ) އިން މިއަދު ވަނީ އެ ޕާޓީއަށް މެމްބަރުން އިތުރުކުރުމުގެ ބޮޑު ހަރަކާތެއް ފަށައިފައެވެ.
މި ހަރަކާތަކީ ޕީއެންސީއަށް ވަންނަން ބޭނުންވެފައި ތިބެ، ނުވަދެވި ތިބި މީހުން ވެއްދުމަށާއި ޕާޓީއަށް މީހުން އިތުރުކުރުމަށް ކުރިއަށް ގެންދާ ހަރަކާތެއްކަމަށް ޕީއެންސީގެ ސެކްރެޓަރީ ޖެނެރަލް ޒީނާޒް އަދުނާން ވިދާޅުވިއެވެ.
ޒީނާޒް އިތުރަށް ވިދާޅުވީ މި ހަރަކާތް މާލޭގެ އިތުރުން އަތޮޅުތަކުގައި ވެސް ބާރަށް ކުރިއަށްދާނެ ކަމަށެވެ. އަދި ޕާޓީއަށް ވަންނަން ބޭނުންވާ މީހުންނަށް ފޯމުތައް ފުރައިދިނުމުގެ މަސައްކަތް ދުރުން ދޮރަށް ހިނގައިގެން، ކުރިއަށްގެންދާނެ ކަމަށްވެސް އޭނާ ވިދާޅުވިއެވެ.
މި ހަރަކާތުގެ އަމާޒަކީ ރާއްޖޭގައި އެންމެ ގިނަ މެމްބަރުން ތިބި ޕާޓީއަށް ޕީއެންސީ ހެދުން ކަމަށް އެޕާޓިން ވަނީ ބުނެފައެވެ. މި ހަރަކާތުގެ ސަބަބުން ޕީއެންސީގެ މެމްބަރޝިޕް އިތުރުވެ، ޕާޓީގެ ބާރު ވަރުގަދަވެގެންދާނެ ކަމަށް ބެލެވެއެވެ.
