ވަޒީފާގައި ދެމިތިބުމަށް ނުވަތަ ވަޒީފާއަށް އެނބުރި އައުމަށް އެދޭ ފަރާތްތަކަށް، އުމުރުން 75 އަހަރުވުމާ ހަމައަށް ވަޒީފާގައި ބޭތިއްބުމާއި، އަލުން ވަޒީފާ ދިނުމުގައި ޢަމަލުކުރާނެ ޤާނޫނެއް އެކުލަވާލުމުގެ އަމަލީ މަސައްކަތް ފެށުމުގެ ގޮތުން ދައުލަތުގެ އެކި އިދާރާތަކާއެކު މަޝްވަރާ ބައްދަލުވުންތައް ފަށައިފިއެވެ.
މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން މިކަން ހާމަކުރައްވަމުން ވިދާޅުވީ، މިއީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ރިޔާސީ ވަޢުދުފުޅުތަކުގެ ތެރޭގައި ހިމެނޭ ކަމެއް ކަމަށެވެ. އެގޮތުން، އެކި ސަބަބުތަކާ ހުރެ ދައުލަތުގެ ވަޒީފާއިން މުސްކުޅިކޮށްފައިވާ އަދި މުސްކުޅިކުރެވޭ ފަރާތްތަކުގެ ތެރެއިން ވަޒީފާގައި ދެމިތިބުމަށް ނުވަތަ ވަޒީފާއަށް އެނބުރި އައުމަށް އެދޭ ފަރާތްތަކަށް ވަޒީފާ ދިނުމަށް މަގުފަހިކުރުމަށް މި ޤާނޫނު އެކުލަވާލެވޭނެ ކަމަށް ވުޒާރާއިން ވިދާޅުވިއެވެ.
އަދި ރައީސުލްޖުމްހޫރިއްޔާގެ އެދިވަޑައިގަތުމުގެ މަތިން، އަންނަ މަހެއްހާ ދުވަހުގެ ތެރޭގައި މި ބިލު ބަންޑާރަ ނައިބުގެ އޮފީހަށް ފޮނުވުމަށް މަސައްކަތްކުރަމުންދާ ކަމަށްވެސް ވުޒާރާއިން ހާމަކުރެއްވިއެވެ.
މި ޤާނޫނު އެކުލަވާލުމުގެ މަޤްޞަދަކީ، ތަޖުރިބާކާރު މުވައްޒަފުންގެ ހުނަރާއި ޤާބިލުކަން ދައުލަތުގެ ވަޒީފާތަކުގައި ދެމެހެއްޓުމާއި، އިސްރަށްވެހިންނަށް އިތުރު ވަޒީފާގެ ފުރުޞަތުތައް ހޯދައިދިނުން ކަމަށް ބެލެވެއެވެ. މި ޤާނޫނުގެ ސަބަބުން، ވަޒީފާގެ ދާއިރާގައި އުމުރުގެ ސަބަބުން ކުރިމަތިވާ ތަފާތުކުރުންތައް ނައްތާލުމަށް މަގުފަހިވެގެންދާނެ ކަމަށް އުއްމީދުކުރެވެއެވެ.
ޢުމުރުން 75 އަހަރުވުމާ ހަމައަށް ވަޒީފާގައި ދެމިތިބުމަށް މަގުފަހިކުރުމަށް ޤާނޫނެއް އެކުލަވާލަން މަސައްކަތް ފަށައިފި
