ރާއްޖެއާއި އިންޑިއާގެ ދެމެދުގައި ޤާއިމްވެފައިވާ ދިގު މުއްދަތުގެ ރަޙްމަތްތެރިކަމާއި އެކުވެރިކަން އިތުރަށް ހަރުދަނާކުރުމުގެ މަޤްޞަދުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އިންޑިއާގެ ބޮޑުވަޒީރު ނަރެންދުރަ މޯދީއަށް ދިވެހިރާއްޖެއަށް ރަސްމީ ދަތުރުފުޅެއް ކުރެއްވުމަށް ދަޢުވަތު އަރުވައިފިއެވެ.
މި ދަޢުވަތު އެރުވުނީ ރައީސުލްޖުމްހޫރިއްޔާ މިހާރު އިންޑިއާއަށް ކުރައްވަމުންގެންދަވާ ރަސްމީ ދަތުރުފުޅުގައި، އިންޑިއާގެ ބޮޑުވަޒީރާ ބައްދަލުކުރެއްވުމަށްފަހު އަދި އެ ޤައުމުގެ އިސްވެރިންނާއެކު ބޭއްވުނު މަޝްވަރާތަކަށް ފަހު ނެރުއްވި ޖޮއިންޓް ސްޓޭޓްމަންޓްގައެވެ.
އަންނަ އަހަރަކީ ދިވެހިރާއްޖެއާއި އިންޑިއާއާ ދެމެދު ޑިޕްލޮމެޓިކް ގުޅުން ޤާއިމުކުރިތާ 60 އަހަރު ފުރޭ އަހަރު ކަމަށްވުމާއެކު، މި މުހިންމު މުނާސަބަތު ފާހަގަކުރުމަށްޓަކައި އިންޑިއާގެ ބޮޑުވަޒީރު ދިވެހިރާއްޖެއަށް ޒިޔާރަތްކުރެއްވުމަށް ރައީސުލްޖުމްހޫރިއްޔާ ޚާއްޞަ ދަޢުވަތެއް އަރުވާފައިވާކަން ފާހަގަކުރެވެއެވެ.
ރައީސުލްޖުމްހޫރިއްޔާ އިތުރަށް ފާހަގަކުރެއްވި ގޮތުގައި، އިންޑިއާއަކީ ދިވެހިރާއްޖޭގެ އިޖްތިމާޢީ އަދި އިޤްތިޞާދީ ތަރައްޤީގައި އަގުހުރި ޙިއްޞާއެއް އަދާކުރަމުންދާ މުހިންމު ބައިވެރިއެކެވެ. އަދި ދެ ޤައުމުގެ ދެމެދުގައިވާ ގުޅުން އިތުރަށް ބަދަހިކޮށް، ގާތުން މަސައްކަތްކުރުމަށް ދިވެހި ސަރުކާރުން ގަދައަޅައި މަސައްކަތްކުރާނެ ކަމުގެ ޔަޤީންކަން އަރުވާފައިވެއެވެ.
މި ދަތުރުފުޅަކީ ރައީސް މުޢިއްޒު މަޤާމާ ހަވާލުވެވަޑައިގަތުމަށްފަހު އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅު ކަމުގައިވާއިރު، މިއީ ދެ ޤައުމުގެ ދެމެދުގައިވާ ގުޅުން އިތުރަށް ހަރުދަނާވެގެންދާނެ މުހިންމު ފިޔަވަޅެއް ކަމުގައި ބެލެވެއެވެ.
ރައީސް ޑރ.މުޢިއްޒު، އިންޑިއާގެ ބޮޑުވަޒީރަށް ރާއްޖެ ވަޑައިގަތުމުގެ ދަޢުވަތު އަރުވައިފި
