ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅަކީ ދިވެހިރާއްޖޭގެ ރައީސަކު އިންޑިއާއަށް ކުރައްވާފައިވާ އެންމެ ކާމިޔާބު ދަތުރުފުޅަށް ވެގެންދާނެ ކަމަށް މާލީ ވަޒީރު އަލްފާޟިލް މޫސާ ޒަމީރު ވިދާޅުވެއްޖެއެވެ.
ވަޒީރު ޒަމީރު މިފަދައިން ވިދާޅުވެފައިވަނީ ރައީސް މުޢިއްޒުގެ އިންޑިއާ ދަތުރުފުޅާ ގުޅޭގޮތުން ދައުލަތުގެ މީޑިއާއަށް ދެއްވި ޚާއްސަ އިންޓަވިއުއެއްގައެވެ. މި ދަތުރުފުޅުގައި ދެ ޤައުމުގެ ދެމެދުގައި ބޭއްވުނު ބައިލެޓަރަލް ބައްދަލުވުންތަކުގެ އިތުރުން، ވިޔަފާރި ފުޅާކުރުމަށް ޚާއްސަ ފޯރަމްތަކެއް ބޭއްވި، އިންޑިއާގައި ދިރިއުޅޭ ދިވެހިންނާވެސް ބައްދަލުކުރެއްވިކަމަށް ވަޒީރު ވިދާޅުވިއެވެ.
"މި ދަތުރުފުޅުގެ ނަތީޖާ ވަރަށް ފާހަގަކޮށްލެވޭ ގޮތަކަށް ފެނިގެންދާނެ," ވަޒީރު ޒަމީރު ވިދާޅުވިއެވެ. "ދިވެހިރާއްޖޭގެ އިޤްތިޞާދު ކުރިއެރުވުމަށް ސަރުކާރުން ގިނަގުނަ މަސައްކަތްތަކެއް ކުރުމަށް ރާވާފައިވޭ. މި ދަތުރުފުޅުގައި ކުރެވުނު އެންމެ މުހިންމު އެއް މަސައްކަތަކީ އިންޑިއާގެ އިންވެސްޓަރުންނަށް ދިވެހިރާއްޖޭގެ އިންވެސްޓްމަންޓް ފުރުޞަތުތަކާ ބެހޭ މަޢުލޫމާތު ހިއްސާކުރުން."
ފަތުރުވެރިކަމުގެ ދާއިރާއަށް ބަލާއިރު، އިންޑިއާއިން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެގެން ދިއުމަށްވެސް މިއީ މުހިންމު ދަތުރުފުޅެއް ކަމުގައި ވަޒީރު ޒަމީރު ފާހަގަކުރެއްވިއެވެ. އަދި ރުޕޭ ކާޑު ތަޢާރަފުކުރުމާ ގުޅިގެން ލިބިގެންދާނެ ކުރިއެރުންތަކާ ބެހޭގޮތުން ވާހަކަފުޅު ދައްކަވަމުން، އިންޑިއާއަށް ދަތުރުކުރާ ދިވެހިންނަށްވެސް މީގެ ސަބަބުން ވަރަށް ބޮޑެތި ފަސޭހަތަކެއް ލިބިގެންދާނެ ކަމަށް ވަޒީރު ޒަމީރު ވިދާޅުވިއެވެ.
ރައީސް މުޢިއްޒުގެ މި ދަތުރުފުޅުގައި ދެ ޤައުމުގެ ދެމެދުގައި އިޤްތިޞާދީ އަދި ސިޔާސީ ގުޅުން އިތުރަށް ބަދަހިވެގެންދާނެ ކަމަށް ބެލެވެއެވެ. އަދި މި ދަތުރުފުޅުގެ ސަބަބުން ދިވެހިރާއްޖޭގެ އިޤްތިޞާދަށް އައު ކުރިއެރުންތަކެއް ލިބިގެންދާނެ ކަމަށް އުންމީދު ކުރެވެއެވެ.
މިއީ ރާއްޖޭގެ ރައީސަކު އިންޑިއާއަށް ކުރައްވާފައިވާ އެންމެ ކާމިޔާބު ދަތުރުފުޅަށް ވެގެންދާނެ: މާލީ ވަޒީރު
