މޯލްޑިވްސް އިމިގްރޭޝަނުން ހިންގި ޚާއްޞަ އޮޕަރޭޝަނެއްގައި ޤާނޫނާ ޚިލާފަށް އުޅެމުންދިޔަ 9 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފިއެވެ. މި ފަރާތްތައް ހައްޔަރުކުރެވުނީ އިއްޔެ ހުޅުމާލޭގައި ހިންގުނު އޮޕަރޭޝަނެއްގެ ތެރެއިންނެވެ.
އިމިގްރޭޝަނުން މަޢުލޫމާތު ދެއްވިގޮތުގައި، މި އޮޕަރޭޝަނަކީ ދިވެހިރާއްޖޭގައި ޤާނޫނާ ޚިލާފަށް ދިރިއުޅެމުންދާ ބިދޭސީންގެ މައްސަލަ ޙައްލުކުރުމަށްޓަކައި ކުރިއަށްގެންދެވޭ މަސައްކަތެކެވެ. މި މަސައްކަތުގައި ކަމާގުޅުންހުރި އެހެނިހެން އިދާރާތަކުގެ އެހީތެރިކަންވެސް ލިބިގެންދާކަމަށް އިމިގްރޭޝަނުން ބުނެއެވެ.
އޮޕަރޭޝަންގެ ތެރެއިން ހުޅުމާލޭގައި 10 ތަނެއް ބަލައި ފާސްކުރެވުނެވެ. އަދި އެތަންތަނުން ފެނުނު 9 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެވިފައެވެ. މި ފަރާތްތަކަކީ ދިވެހިރާއްޖޭގެ ޤާނޫނުތަކާއި ގަވާއިދުތަކާ ޚިލާފަށް ރާއްޖޭގައި ދިރިއުޅެމުން ގޮސްފައިވާ ބައެއްކަމަށް އިމިގްރޭޝަނުން ވިދާޅުވިއެވެ.
މި އޮޕަރޭޝަނަކީ މުއްދަތެއްގެ މެދުކެނޑުމަކަށްފަހު އަލުން ފެށިފައިވާ އޮޕަރޭޝަނެކެވެ. އިމިގްރޭޝަނުން މަޢުލޫމާތު ދެއްވިގޮތުގައި، މި މަސައްކަތް ވަގުތީގޮތުން މަޑުޖައްސާލަން ޖެހުނީ ހުޅުމާލޭގައި ހުންނަ ޑިޓެންޝަން ސެންޓަރުގެ ޖާގަ ފުރިފައިވުމުގެ ސަބަބުންނެވެ. މި ސެންޓަރަކީ 200 މީހުންގެ ޖާގަ ލިބޭ ތަނެކެވެ. ކުރިން ހިންގުނު އޮޕަރޭޝަންތަކުގައި މި ޢަދަދަށް މީހުން އިމިގްރޭޝަންގެ ބެލުމުގެ ދަށަށް ގެނެވުމާ ގުޅިގެން، އެ ފަރާތްތައް ޤައުމުން ފުރުވާލެވެންދެން އޮޕަރޭޝަން ވަގުތީގޮތުން މަޑުޖައްސާލަން ޖެހުނު ކަމަށް އިމިގްރޭޝަނުން ވިދާޅުވިއެވެ.
އިމިގްރޭޝަނުން އިތުރަށް ބުނިގޮތުގައި، މިފަދަ އޮޕަރޭޝަންތައް ކުރިއަށް އޮތް ދުވަސްތަކުގައިވެސް ކުރިއަށްގެންދާނެއެވެ. އަދި ޤާނޫނާ ޚިލާފަށް ރާއްޖޭގައި ދިރިއުޅޭ ބިދޭސީންގެ މައްސަލަ ޙައްލުކުރުމަށް އިމިގްރޭޝަނުން މަސައްކަތްކުރަމުންދާ ކަމަށްވެސް ވިދާޅުވިއެވެ.
ޤާނޫނާ ޚިލާފަށް އުޅެމުންދިޔަ 9 ބިދޭސީއަކު ހުޅުމާލެއިން އިމިގްރޭޝަންގެ ބެލުމުގެ ދަށަށްގެންގޮސްފި
