އިޤްތިޞާދީ ތަރައްޤީއާއި ބެހޭ ވުޒާރާއިން މިއަދު ހާމަކުރި ގޮތުގައި، ރާއްޖޭގެ އައު ޑިވެލޮޕްމެންޓް ބޭންކުގެ ޚިދުމަތްތައް މިއަހަރު ތެރޭގައި ފެށުމަށް ވަނީ އަމާޒު ހިފާފައެވެ. މިކަމާ ގުޅިގެން، ބޭންކަށް މުވައްޒަފުން ނެގުމުގެ މަސައްކަތް ވެސް މިހާރު ވަނީ ފަށައިފައެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭންކަށް ލައިސެންސް ދީފައިވަނީ އަންނަ އަހަރުގެ އޮކްޓޯބަރ 12 ގެ ކުރިން މަސައްކަތް ފެށުމަށެވެ. ނަމަވެސް، ވުޒާރާއިން ބުނާ ގޮތުގައި މިއަހަރު ތެރޭގައި ބޭންކުގެ ޚިދުމަތްތައް ފެށުމަށް ވަނީ ރޭވިފައެވެ.
ޑިވެލޮޕްމެންޓް ބޭންކުން އަމާޒު ކުރާ މައިގަނޑު 5 ދާއިރާއަކީ ކާބޯތަކެތި، ބޯހިޔާވަހިކަން، ތިމާވެށި، ފަތުރުވެރިކަން، އަދި ކަނޑުގެ އިޤްތިޞާދެވެ. މި ދާއިރާތަކަށް އަމާޒުކޮށްގެން ބޭންކުން އެކި ބާވަތުގެ މާލީ އެހީތެރިކަން ފޯރުކޮށްދޭނެ ކަމަށް ބެލެވެއެވެ.
އިތުރު މަޢުލޫމާތު ދެމުން ވުޒާރާއިން ބުނެފައިވަނީ ބޭންކުގެ އިމާރާތް ޤާއިމްކުރެވޭނީ މާލޭގައި ހުންނަ އެލައިޑް ބިލްޑިންގްގައި ކަމަށެވެ. މިއީ ގިނަ ބައެއްގެ ސަމާލުކަން ލިބިފައިވާ މަޝްރޫޢެއް ކަމަށްވުމާއެކު، ބޭންކުގެ މަސައްކަތްތައް ފެށުމާ ގުޅޭ އިތުރު މަޢުލޫމާތު ކުރިއަށް އޮތް ދުވަސްތަކުގައި ހާމަކުރާނެ ކަމަށް ވުޒާރާއިން ބުނެފައިވެއެވެ.
ޑިވެލޮޕްމެންޓް ބޭންކުގެ ޚިދުމަތްތައް މިއަހަރު ތެރޭގައި ފެށުމަށް އަމާޒުހިފައިފި
